काठमाडौ ८ असार । नेकपा एकीकृत समाजवादी का सांसद प्रकाश ज्वालाले सहरी विकास मन्त्री प्रकाशमान सिंहले स्वर्गीय गणेशमान सिंहको अपमान गरेको टिप्पणी गरेका छन्।

आइतबार बसेको प्रतिनिधिसभा बैठकमा बोल्दै उनले गणेशमानको नाममा करिब ५७ करोड बजेट विनियोजन भएको भन्दै आपत्ति जनाए। उत्पादनमूलक र युवाहरूलाई रोजगारी दिने कार्यक्रममा नभई अनुत्पादक संरचनाहरू बनाउने नाममा प्रकाशमानले गणेशमानको बदनाम गरेको ज्वालाको भनाइ छ।

‘आज सहरी विकास मन्त्रालयको पनि विषय रहेछ, परिभाषा अनुसारकै काम गरिरहेको छैन सहरी विकास मन्त्रालयले,’ ज्वालाले भने, ‘आफ्ना रुचिका, आफ्ना आसेपासेका लागि, आफ्ना वरिपरिका मान्छेहरूका लागि कहाँ–कहाँबाट घुमाएर पैसा हाल्न सकिन्छ, जुनसुकै शीर्षकमा पनि योजनाहरू थुपारेर आफ्ना भरौटेहरूलाई पाल्ने, पोस्ने र बिचौलियाहरूले कमाइ खाने भाँडो बनाइएको छ, सहरी विकास मन्त्रालय। यस्तो खालको ज्यादती, बेथिति, यसको पनि एउटा हद हुन्छ।’

उनले गणेमानको नाममा कुनै उत्पादनमुलक क्षेत्रमा बटेज नछुट्याएको समेत बताए। ‘गणेशमानको नाममा करिब ५७ करोड बजेटरु कुनै उत्पादनमूलक काममा होइन, युवाहरूलाई रोजगारी दिने कार्यक्रममा होइन, अनुत्पादक संरचनाहरू बनाउने नाममा गणेशमानलाई बदमान गर्नुभयो तपाईँले,’ ज्वालाले भने, ‘तपाईँ माफी माग्नुस्, यो रोष्टमबाट। गणेशमानलाई सबैले सम्मान गर्छन्, तपाईँले अपमान गर्नुभयो। मंगलादेवीलाई तपाईँ अपमान गर्नुभयो।’

उनले स्वर्गीय पुष्पलालको नाममा ७० लाख विनियोजन गरेर सहरी विकास मन्त्रीले काठमाडौँमा गाई जात्रा गरेको टिप्पणी समेत गरे।