काठमाडौ २२ असार । नेपाली कांग्रेसका नेता मिनेन्द्र रिजालले पार्टी विधान दुई चरणमा गर्नु उपयुक्त हुने प्रस्ताव राखेका छन् । कांग्रेसले १५ औं महाधिवेशन अघि विधान संशोधन गर्ने निर्णय गरिसकेको छ । यद्यपि, विधान मस्यौदा समिति भने गठन भइसकेको छैन ।

विधानमा गर्नुपर्ने संशोधनहरूका विषयमा चर्चा चलिरहँदा नेता रिजालले दुई चरणमा संशोधन गर्नुपर्ने विचार राखेका हुन् ।

महाधिवेशन प्रतिनिधि मात्रै छनोट गरेर सभापति चयन गर्ने गरी पहिलो चरणको संशोधनको प्रस्ताव उनले राखेका छन् ।

‘पहिलो चरणमा महाधिवेशन प्रतिनिधिको मात्रै निर्वाचन गरौँ । र, महाधिवेशन प्रतिनिधिबाट सभापतिको निर्वाचन गरौँ,’ रिजालले भने, ‘त्यो सभापतिको तत्काल कार्यकाल सुरु गर्ने होइन । आम निर्वाचन पछाडिको मात्रै कार्यकाल सुरु हुनेछ ।’

दोस्रो चरणमा विधान संशोधन गर्दा त्यसबेलाको सभापतिले आफूले चाहे अनुसारको व्यवस्था अनुसार विधानमा राख्न सक्ने उनले बताए ।

‘सभापति हुने व्यक्तिले विधान संशोधनको प्रस्ताव पार्टी लिएर उसले जान्छ । जस्तो पार्टी बनाउन खोजेको हो, जति वटा निर्वाचन बनाउन खोजेको हो,’ रिजालले केन्द्रीय समिति बैठकमा भने, ‘जुन जुन तह राख्न खोजेको हो, त्यही अनुसारको प्रस्ताव होला । आम निर्वाचन सकिएपछि कांग्रेसले बाँकी कामका लागि बाँकी महाधिवेशन गर्छ ।’

महाधिवेशन प्रतिनिधिको मात्रै निर्वाचन भयो भने तल तलसम्म गुटबन्दी समेत नहुने रिजालले दाबी गरे । तह तहमा हुने महाधिवेशनको तिक्तताले आन्तरिक वैमनस्यता उत्पन्न भई आम निर्वाचनमा पार्टीलाई असर गर्ने उनले बताए । उनले भने, ‘जुनसुकै गुट चुनाव लडोस्, पार्टी भलो बाटोमा जाँदैन भन्ने मलाई लाग्छ ।’

पार्टीभित्र महाधिवेशन कहिले हुने बहस चलिरहँदा कम्तीमा सय जना सभापतिको दाबीकर्ता देखेको उनले बताए ।

‘कम्तीमा सभापति उम्मेदवार देखेको छु मैले । पार्टी कसरी बनाउने भन्दा मलाइ सभापति बनाइदिनुस्, बाँकी सबै ठीक हुन्छ भनेर । त्यो भन्दा बढी मैले सुनेको छैन,’ रिजालले भने, ‘जुन भाषामा, जुन शैलीमा, जुन भंगिमा बोल्नुभएको छ, सभापति मलाई बनाइदिनुस्, बाँकी भएका सबै समस्या समाधान हुन्छ । अहिले सम्म कहिल्यै नभएको जस्तो पार्टी संगठन बनाउँछु भन्नुभएको छ । त्यसरी पार्टी संगठन बन्दैन ।’