काठमाडौ ३ साउन । नागढुङ्गा–मुग्लिन सडक खण्डमा निर्माणदेखि पहिरो रोकथामको काम भइरहेको छ ।

नागढुङ्गा–नैबिसेको पहिलो प्याकेजअन्तर्गत चिनियाँ कम्पनी जियाङ्सु र नेपाली साझेदार कम्पनी सगुनले काम गरिरहेको छ ।

यो सडक खण्डमा कालोपत्रेको काम सकिएको निर्माण व्यवसायी ज्ञानेन्द्र घिमिरे बताउनुभयो । उहाँका अनुसार झ्याप्ले खोलामा सडक निर्माणसँगै पहिरो रोकथामको काम चलिरहेको छ ।

एक वर्षअघि झ्याप्ले खोलामा पहिरोले जनधनको क्षति गरेको थियो । असोजमा गएको पहिरोले ३५ जनाको ज्यान लिएको थियो ।

निर्माण व्यवसायी घिमिरेका अनुसार लेदोसहितको पहिरोको कारणबारे पनि अध्ययन भइरहेको छ । सडक भन्दा माथिको प्लटिङले गर्दा पहिरो आएको प्रारम्भिक अनुमान छ ।

अहिले भित्तामा ‘ग्याबिन’ लगाइएको छ । प्लटिङ भएको भाग आसपासका भित्तामा बाँस रोप्नेदेखि अत्याधुनिक तवरले भित्तालाई आरसीसी ढलान गरिँदैछ ।

नागढुङ्गा–मुग्लिङ सडक योजना पूर्वी खण्ड आयोजना प्रमुख केशवप्रसाद ओझाका अनुसार दुई वटा प्याकेजमध्ये एउटा प्याकेज नागढुङ्गा–नैबिसे खण्डसम्म र अर्को नैबिसे–मलेखु खण्डसम्ममा झन्डै ५५ किलोमिटरमध्ये २७ किलोमिटरमा पहिलो तहको कालोपत्रे सम्पन्न भएको छ ।

त्यसैमा १५ वटा पुलमध्ये आठ वटा पुलबाट गाडी नै चल्न शुरू गरेका छन् । निमार्ण तथा पुललगायतको काम भइरहेको र अर्को बर्खामा यात्रुले सास्ती खेप्नुनपर्ने उहाँको दाबी छ ।