काठमाडौ १५ साउन । संस्कृति, पर्यटन तथा नागरिक उड्डयन मन्त्री बद्री पाण्डले जहाज थप्नेबारे सरकार आन्तरिक गृहकार्यमा जुटिरहेको बताएका छन्।

बिहीबार संघीयता सबलीकरण तथा राष्ट्रिय सरोकार समितिको बैठकमा बोल्दै मन्त्री पाण्डेले हाल नेपाल एयरलाइन्सका सबै छ वटै जहाज सञ्चालनमा रहेको भएपनि यात्रुको मागअनुसार उडान गर्न जहाज अभाव रहेको बताएका हुन्। उनले एयरलाइन्सका सबै प्राविधिक सम्भावित समस्याहरुप्रति पनि मन्त्रालय गम्भीर भएको बताए। उनले सातवटै प्रदेशमा साना विमान सञ्चालन गर्ने सम्भावनाबारे पनि मन्त्रालयले प्रारम्भिक छलफल अघि बढाएको बताए।

प्रदेशअन्तर्गतका विमानस्थलहरु सञ्चालनको लागि सबै प्रदेशमा एउटा—एउटा सानो विमान किन्नेबारे पनि प्रदेश सरकारहरुसँग छलफल भइरहेको उनको भनाइ छ।

उनले नेपाल एयरलाइन्सको हवाई सेवा सशक्त बनाउन मन्त्रालयले पारदर्शी प्रक्रियामार्फत नयाँ विमान खरिद गर्ने वा लिजमा ल्याउने योजना बनाइरहेको स्पष्ट पारे।

उनले भने, ‘सातवटा प्रदेशमा सातवटा साना प्लेनको प्रबन्ध गर्न सकियो भने तद्तद् प्रदेशहरूमा चलाउन सकिन्थ्यो कि। कोसी प्रदेशले केही एप्रोच हामीसँग गरेको पनि छ। अरु ठूला प्लेनहरूको सन्दर्भमा हाम्रो जापान, थाइल्याण्ड, अष्ट्रेलिया र कोरियामा समेत फ्लाइट पुगेको छैन। धेरै ठाउँमा उडानको आवश्यकता वोध भएको छ। त्यतिधेरै हामीसँग एयरक्राफ्ट छैनन्। त्यसको लागि पारदर्शी हिसाबले किन्ने र त्यसको लागि स्रोत जुटाउने तथा लिजमा चलाउने उपायका बारेमा मन्त्रालय सोचिरहेको छ।’

उनले नेपालसँग विमान अभाव भएकै कारण विदेशी हवाई कम्पनीहरूले नेपाललाई लतार्ने काम गरिरहेको टिप्पणी गरे।