काठमाडौं, २० भदौ । अमेरिकाले १९ जना नेपालीलाई त्रिभुवन विमानस्थल ल्याएर छाडिदिएको छ । पछिल्लो समयमा डिपोर्ट गरिएकामध्ये १९ जना बिहीबार बेलुका काठमाडौंस्थित त्रिभुवन अन्तर्राष्ट्रिय विमानस्थल ल्याएर छाडिएको बताइएको छ ।

अमेरिकाले त्यहाँको अध्यागमन कानुन उल्लंघन गरेको आरोपमा देश निकाला जारी राखेको छ । त्यसमध्ये कैयौँ नेपाली पनि रहेका छन् । पछिल्लो समय ३७ जना नेपालीलाई डिपोर्टको तयारी गरिएको थियो । तर १९ जनालाई मात्रै ल्याइएको जनाइएको छ ।

जसमा १७ जना पुरुष र २ जना महिला रहेका छन् । उनीहरुलाई अमेरिकाले चार्टर्ड विमानमा ल्याएर छाडिदिएको हो । त्रिभुवन अन्तर्राष्ट्रिय विमानस्थल स्थित अध्यागमन कार्यालयका वरिष्ठ अध्यगमन अधिकृत अन्जन न्यौपानेका अनुसार उनीहरूलाई अध्यागमनले बुझेपछि प्रहरीलाई बुझाइएको छ।

वरिष्ठ अध्यागमन अधिकृत न्यौपानेका अनुसार डोनाल्ड ट्रम्प दोस्रोपटक अमेरिकाको राष्ट्रपति भएपछि अमेरिकाले २३४ जना नेपालीलाई डिपोट गरिसकेको छ।

नेपाल फर्किएका एकजना विद्यार्थी पनि रहेका छन् । मादक पदार्थ सेवन गरेर गाडी चलाएको आरोपमा उनलाई फिर्ता गरिएको पाइएको स्रोतले जानकारी दिएको छ । अर्का एकजना लायन्सको कार्यक्रममा सहभागी हुन पुगेर अवैधानिकरुपमा बसेर पनि त्यहाँको कानुन विपरीत काम गरेको पाइएको आरोप लागेको छ ।

विमानस्थलमा ल्याएका १९ जनालाई प्रहरीको मानव बेचविखन ब्यूरोमा बुझाइएको छ ।