काठमाडौँ । नेपाली कांग्रेसका नेता डा. शेखर कोइराला कांग्रेसको संस्थापनइतर पक्षले आयोजना गर्न लागेको राष्ट्रिय भेलामा सहभागी हुने भएका छन्।

संस्थापनइतर पक्षले आगामी साउन २९ देखि ३१ गतेसम्म काठमाडौँमा राष्ट्रिय भेला आयोजना गर्दैछ। भेलाका लागि डा. शशांक कोइरालाको नेतृत्वमा आयोजक समिति गठन गरिएको छ।

राष्ट्रिय भेला आयोजनासम्बन्धी पछिल्ला छलफलमा सहभागी नभएका डा. शेखर कोइराला भने उद्घाटन समारोहमा सहभागी हुने उनको सचिवालयले जनाएको छ।

उनको सचिवालयले राष्ट्रिय भेला पार्टी विभाजनका लागि नभएकाले डा. कोइरालाले कार्यक्रममा सहभागी भएर पार्टी एकताका लागि आह्वान गर्ने जनाएको छ।

“त्यो कुनै पार्टी विभाजन गर्ने भेला नभएकाले उक्त भेलामा सहभागी भएर डा. कोइरालाले पार्टी एकताकै लागि आह्वान गर्नुहुनेछ,” सचिवालयले जनाएको छ।

यसैगरी, कांग्रेसका पूर्वसभापति शेरबहादुर देउवा पनि उक्त राष्ट्रिय भेलामा सहभागी हुने भएका छन्। देउवा आगामी साउन २८ गते बैंककबाट स्वदेश फर्कने कार्यक्रम रहेको बताइएको छ।

शेखर कोइराला र शेरबहादुर देउवा दुवैको सहभागिताले संस्थापनइतर पक्षको राष्ट्रिय भेलालाई कांग्रेसभित्रको आगामी राजनीतिक दिशा र आन्तरिक एकताका दृष्टिले महत्वपूर्ण रूपमा हेरिएको छ।

Originally published on abcnews.com.np.