काठमाडैं २ असोज । प्रधानमन्त्री सुशीला कार्कीले भारतीय प्रधानमन्त्री नरेन्द्र मोदीसँग टेलिफोन कुराकानी गरेकी छिन्। दुई प्रधानमन्त्रीबीच करिब २० मिनेट कुरा भएको कार्कीको सचिवालयले जनाएको छ ।

टेलीफोन कुराकानीबारे भारतीय प्रधानमन्त्री मोदीले एक्समार्फत जानकारी दिँदै शान्ति तथा स्थिरता पुनर्स्थापना गर्न भारतको अटल समर्थन रहने कुरामा आश्वस्त पारेको उल्लेख गरेका छन्।

‘नेपालको अन्तरिम सरकारकी प्रधानमन्त्री श्रीमती सुशीला कार्कीसँग आत्मीयतापूर्ण वार्ता गरें,’ उनले लेखेका छन्, ‘हालैको दुःखद घटनामा ज्यान गुमाएका प्रति गहिरो संवेदना व्यक्त गरें र शान्ति तथा स्थिरता पुनर्स्थापना गर्न उहाँले गर्नुभएका प्रयासप्रति भारतको अटल समर्थन रहने कुरा पुनः आश्वस्त गराएँ।’

उनले संविधान दिवसको पनि शुभामना दिएको भन्दै उल्लेख गरेका छन्,’साथै, भोलि नेपालकै राष्ट्रिय दिवसको अवसरमा उहाँलाई र सम्पूर्ण नेपाली जनतालाई हार्दिक शुभकामना पनि प्रेषण गरें।’
प्रधानमन्त्री मोदीले संविधान दिवस भन्ने उल्लेख नगरीकन नेपालको राष्ट्रिय दिवस भन्दै शुभकामना दिएको एक्समा लेखेका छन् । सन् २०१५ मा संविधान जारी हुनेबेला भारतले आफ्नो सरोकार सुनुवाई नभएको भन्दै नेपालमा संविधान जारी भएको नोट गरेको उल्लेख गरेको थियो ।