काठमाडौं । रसुवाको स्याफ्रुबेँसी, टिमुरेलगायत क्षेत्रमा अचानक आएको भीषण बाढीपछि प्रधानमन्त्री वालेन्द्र शाह (बालेन) ले विपद् जोखिम न्यूनीकरण तथा व्यवस्थापन राष्ट्रिय परिषद्को बैठक बोलाउनुभएको छ।

प्रधानमन्त्रीको सचिवालयका अनुसार राष्ट्रिय विपद् जोखिम न्यूनीकरण तथा व्यवस्थापनसम्बन्धी उच्चस्तरीय बैठक केहीबेरमै सुरु हुने भएको छ। बाढीबाट भएको क्षति, खोज तथा उद्धार, राहत व्यवस्थापन र तल्लो तटीय क्षेत्रमा देखिन सक्ने सम्भावित जोखिमबारे बैठकमा छलफल हुने अपेक्षा गरिएको छ।

यसअघि प्रधानमन्त्री शाहको निर्देशनमा सम्भावित उद्धार तथा राहत कार्यका लागि नेपाली सेनाका दुईवटा हेलिकप्टर मेडिकल टोलीसहित प्रभावित क्षेत्रतर्फ पठाइसकिएको छ। निजी हेलिकप्टर कम्पनीहरूलाई समेत उद्धार तथा खोज कार्यका लागि तयारी अवस्थामा रहन भनिएको छ।

अहिले गृह मन्त्रालयमा गृहमन्त्री सुधन गुरुङको अध्यक्षतामा राष्ट्रिय विपद् जोखिम न्यूनीकरण तथा व्यवस्थापन प्राधिकरणको बैठक पनि चलिरहेको जनाइएको छ। बैठकले प्रभावित क्षेत्रको पछिल्लो अवस्था, उद्धार कार्यको प्रगति र थप आवश्यक जनशक्ति तथा राहत सामग्री परिचालनबारे छलफल गरिरहेको छ।

जोखिमयुक्त क्षेत्र खाली गर्न निर्देशन

सरकारले रसुवामा बाढी आएलगत्तै पीडितको खोज, उद्धार तथा राहत कार्यलाई तीव्र बनाएको जनाएको छ। जोखिमयुक्त क्षेत्रमा रहेका नागरिकलाई तत्काल सुरक्षित स्थानमा सार्न सम्बन्धित प्रमुख जिल्ला अधिकारीलाई निर्देशन दिइसकिएको छ।

बाढीको प्रभाव तल्लो तटीय क्षेत्रमा समेत पर्न सक्ने सम्भावनालाई ध्यानमा राख्दै अन्य जोखिमयुक्त स्थानका नागरिकलाई पनि सुरक्षित स्थानमा जान निरन्तर सूचना प्रवाह भइरहेको बताइएको छ।

तीन प्रमुख सडकमा यात्रा नगर्न आग्रह

बाढी र सम्भावित जोखिमका कारण सरकारले पृथ्वी राजमार्ग, गल्छी–नुवाकोट–रसुवा–स्याफ्रुबेँसी सडक तथा मुग्लिन–नारायणगढ सडकमा आवश्यक सतर्कता अपनाउन र यात्रा नगर्न/नगराउन आग्रह गरेको छ।

प्रधानमन्त्री शाहले प्रभावित क्षेत्रमा तत्काल आवश्यक पर्ने खाद्यान्न, त्रिपाल, औषधि तथा अन्य राहत सामग्रीको व्यवस्था गर्न पनि सम्बन्धित निकायलाई निर्देशन दिनुभएको छ।

रसुवाको भोटेकोशी क्षेत्रमा आएको बाढीले टिमुरे र आसपासका बस्ती, बजार, रसुवा नाका तथा विभिन्न सरकारी संरचनामा ठूलो क्षति पुर्‍याएको प्रारम्भिक विवरण आइरहेका छन्। क्षतिको विस्तृत विवरण संकलन तथा उद्धार कार्य जारी रहेको सरकारी निकायहरूले जनाएका छन्।

Originally published on abcnews.com.np.