काठमाडौं, १३ फागुन । हाल नेपालमा पश्चिमी न्यून चापीय प्रणालीको आंशिक प्रभाव देखिएको छ। जसका कारण आज देशका विभिन्न पहाडी तथा हिमाली भूभागमा वर्षा र हिमपातको सम्भावना रहेको मौसम पूर्वानुमान महाशाखाले जनाएको छ।कोशी, गण्डकी र कर्णाली प्रदेशका पहाडी तथा हिमाली क्षेत्रमा सामान्य बदली रहनेछ।

कोशी, बागमती र गण्डकी प्रदेशका थोरै स्थानहरूमा तथा लुम्बिनी, कर्णाली र सुदूरपश्चिमका एक–दुई स्थानमा चट्याङ्गसहित हल्का वर्षा र हिमपात हुने सम्भावना छ।तराईका भूभागमा मौसम मुख्यतया सफा रहे पनि केही स्थानमा हुस्सु र कुहिरो लाग्ने देखिन्छ। राति गण्डकी र अन्य प्रदेशका हिमाली भेगमा आंशिकदेखि सामान्य बदली रहनेछ।

कोशी, बागमती र गण्डकी प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा र हिमपातको सम्भावना कायमै रहने महाशाखाको भनाइ छ। तराईका केही स्थानमा राति तुवाँलो लाग्न सक्ने अनुमान गरिएको छ। पहाडी भूभागमा हुने चट्याङ्ग र हिमपातका कारण हुनसक्ने चिसोबाट बच्न र आवश्यक सतर्कता अपनाउन महाशाखाले अनुरोध गरेको छ।