काठमाडौं । रसुवाको भीषण बाढीले बगाएर बेपत्ता भएकामध्ये चितवन जिल्लामा हालसम्म एक सय ३५ जनाको शव फेला परेको छ। फेला परेका शवको पहिचान प्रक्रियालाई व्यवस्थित र सहज बनाउन भरतपुरस्थित औद्योगिक व्यवसाय विकास प्रतिष्ठानको हलमा अस्थायी शव पहिचान कक्ष स्थापना गरिएको छ।

चितवनका प्रहरी प्रमुख एसपी रामेश्वर पौडेलका अनुसार फेला परेका शवहरूलाई उक्त अस्थायी पहिचान कक्षमा ल्याएर व्यवस्थित रूपमा राख्ने व्यवस्था मिलाइएको छ। शव व्यवस्थापनका लागि सातवटा विशेष डेकर निर्माण गरिएको उनले जानकारी दिए।

तस्बिरमार्फत पहिचानको तयारी

शवको पहिचान प्रक्रियालाई सहज बनाउन चिकित्सकहरूको टोलीले शव सफा गरी महिला, पुरुष तथा उमेर समूहका आधारमा छुट्ट्याएको छ। त्यसपछि प्रत्येक शवको स्पष्ट तस्बिरसमेत तयार गरिएको छ।

एसपी पौडेलका अनुसार ती तस्बिरहरू शुक्रबार बिहान ७ बजेदेखि औद्योगिक व्यवसाय विकास प्रतिष्ठानको ठूलो हलमा राखिनेछ। आफ्ना आफन्तको खोजीमा आउने परिवारजनले तस्बिरमार्फत शव पहिचान गर्न सक्ने व्यवस्था मिलाइएको छ।

शव संरक्षण र सुरक्षा व्यवस्था

शवलाई सुरक्षित राख्न आवश्यक तापक्रम व्यवस्थापनको तयारी गरिएको छ। शवहरूलाई माइनस डिग्रीको तापक्रममा संरक्षण गर्ने व्यवस्था मिलाइएको प्रहरीले जनाएको छ।

अस्थायी पहिचान कक्षको सुरक्षाका लागि रातिको समयमा समेत सुरक्षाकर्मी परिचालन गरिएको छ। शवको व्यवस्थापन, पहिचान तथा परिवारजनको आवतजावतलाई व्यवस्थित बनाउन प्रशासन, प्रहरी र स्वास्थ्यकर्मीको समन्वयमा काम भइरहेको छ।

पीडित परिवारलाई निःशुल्क आवास

शव पहिचानका लागि चितवन आउने पीडित परिवारजनको सुविधाका लागि जिल्ला प्रशासन कार्यालय चितवनले निःशुल्क होटलमा बस्ने व्यवस्था मिलाएको छ।

रसुवाको बाढीपछि नदी प्रणाली हुँदै चितवनसम्म बगेर आएका शव फेला पर्ने क्रम जारी रहेकाले खोजी, व्यवस्थापन र पहिचान कार्यलाई उच्च प्राथमिकताका साथ अघि बढाइएको सुरक्षा निकायले जनाएको छ।

Originally published on abcnews.com.np.