‘राष्ट्रिय स्वाधीनता, संविधान र कम्युनिस्ट आन्दोलन जोगाउन तत्काल कार्यगत एकता आवश्यक’

काठमाडौं, १४ असार। नेपाली कम्युनिस्ट पार्टी (नेकपा) का संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ ले राष्ट्रिय स्वाधीनता, संविधान र कम्युनिस्ट आन्दोलनमाथि चुनौती बढिरहेको दाबी गर्दै वामपन्थी शक्तिहरूबीचको सहकार्य र कार्यगत एकतालाई अब थप ढिला गर्न नहुने बताएका छन्। उनले सहकार्यमा ढिलाइ भए राजनीतिक रूपमा गम्भीर दुर्घटना हुन सक्ने चेतावनीसमेत दिएका छन्।

आइतबार काठमाडौंस्थित राष्ट्रिय सभा गृहमा जननेता मदन भण्डारीको ७५औँ जन्मजयन्ती का अवसरमा आयोजित ‘नेपालको कम्युनिस्ट आन्दोलन र जननेता मदन भण्डारी’ विषयक विचार गोष्ठी तथा ‘मदन भण्डारी राष्ट्रिय पुरस्कार हस्तान्तरण समारोह’ लाई सम्बोधन गर्दै प्रचण्डले अहिलेको राष्ट्रिय तथा राजनीतिक परिस्थितिले सबै वामपन्थी र देशभक्त शक्तिलाई साझा मोर्चामा उभिन बाध्य बनाएको बताए।

कार्यगत एकतामा ढिलाइ नगर्न आग्रह

प्रचण्डले तत्काल पार्टी एकीकरणको कुरा नभए पनि साझा मुद्दामा कार्यगत एकता अपरिहार्य भइसकेको स्पष्ट पारे। उनले भने,

“आजको भोलि नै पार्टी एकता गर्ने कुरा होइन। तर राष्ट्रिय स्वाधीनता, लोकतन्त्र र जनताको अधिकारको रक्षा गर्ने प्रश्नमा कार्यगत एकतामा ढिलाइ गर्नु ठूलो गल्ती हुन्छ।”

उनका अनुसार वैचारिक भिन्नता रहे पनि राष्ट्रिय हितका सवालमा वामपन्थी शक्तिहरूबीच सहकार्य अपरिहार्य बनेको छ।

‘राष्ट्रिय स्वाधीनतामाथि दबाब बढ्दै गएको छ’

सम्बोधनका क्रममा प्रचण्डले नेपालमाथि वैदेशिक दबाब र हस्तक्षेप बढिरहेको दाबी गर्दै त्यसको सामना गर्न वामपन्थी तथा देशभक्त शक्तिहरू एकजुट हुनुपर्ने आवश्यकता औँल्याए।

उनले भने,

“राष्ट्रिय स्वाधीनताका पक्षमा, निरंकुशताका विरुद्ध तथा वैदेशिक दबाब र हस्तक्षेपका विरुद्ध छिटोभन्दा छिटो वामपन्थी र देशभक्त शक्तिहरू एक हुनुपर्छ। यसलाई ढिला गर्नु ठूलो गल्ती हुनेछ।”

उनले समयमै सहकार्य हुन नसके देशको राजनीतिक स्थायित्व र लोकतान्त्रिक उपलब्धिमाथि थप जोखिम आउन सक्ने संकेत गरे।

‘भदौ २४ पछि प्रतिक्रान्तिकारी कदम बढे’

प्रचण्डले गत भदौ २४ पछि मुलुकको राजनीतिक दिशामा नकारात्मक परिवर्तन आएको दाबी गरे। उनका अनुसार त्यसयता राष्ट्रियता कमजोर पार्ने र कम्युनिस्ट आन्दोलनलाई कमजोर बनाउने प्रयासहरू तीव्र भएका छन्।

उनले भने,

“नेपालबाट कम्युनिस्ट आन्दोलनको प्रभाव समाप्त पार्न दुनियाँभरका प्रतिक्रियावादी शक्तिहरू सक्रिय भएका छन्।”

उनले देशभित्र र बाहिरका प्रतिक्रियावादी शक्तिहरूले नेपालको राजनीतिक उपलब्धि उल्ट्याउने प्रयास गरिरहेको आरोपसमेत लगाए।

सरकारमाथि संविधान कमजोर पार्न खोजेको आरोप

प्रचण्डले वर्तमान सरकारप्रति पनि कडा आलोचना गर्दै सरकारले संविधानका आधारभूत मूल्य र कम्युनिस्ट आन्दोलनलाई कमजोर बनाउने दिशामा काम गरिरहेको आरोप लगाए।

उनका अनुसार वर्तमान राजनीतिक परिस्थिति सामान्य नभएकाले लोकतान्त्रिक गणतन्त्र, संविधान र राष्ट्रिय स्वाधीनताको रक्षाका लागि साझा राजनीतिक पहल आवश्यक भइसकेको छ।

मदन भण्डारीको विचार स्मरण

मदन भण्डारीको ७५औँ जन्मजयन्तीको अवसरमा आयोजित कार्यक्रममा बोल्दै प्रचण्डले जननेता मदन भण्डारीले अघि सारेका राष्ट्रियता, लोकतन्त्र र जनमुखी राजनीतिको विचार आज पनि उत्तिकै सान्दर्भिक रहेको बताए।

उनले भण्डारीले नेपाली कम्युनिस्ट आन्दोलनलाई नयाँ वैचारिक दिशा दिएको उल्लेख गर्दै वर्तमान चुनौतीको सामना गर्न त्यही राष्ट्रिय दृष्टिकोणबाट अघि बढ्नुपर्ने धारणा व्यक्त गरे।

वाम राजनीति पुनः केन्द्रमा ल्याउने संकेत

प्रचण्डको पछिल्लो अभिव्यक्तिलाई नेपालको वाम राजनीतिमा नयाँ सहकार्यको संकेतका रूपमा पनि हेरिएको छ। पछिल्ला महिनाहरूमा विभिन्न कम्युनिस्ट दलहरूबीच संवाद र सहकार्यको चर्चा भइरहेका बेला उनले सार्वजनिक रूपमा “कार्यगत एकता” लाई प्राथमिकता दिनुपर्ने सन्देश दिएका हुन्।

यद्यपि उनले तत्काल पार्टी एकीकरणको सम्भावना नरहेको स्पष्ट पार्दै साझा राष्ट्रिय मुद्दामा सहकार्य सुरु गर्नु नै अहिलेको सबैभन्दा महत्वपूर्ण आवश्यकता भएको बताए।

राजनीतिक विश्लेषकहरूका अनुसार प्रचण्डको यो अभिव्यक्ति आगामी दिनमा नेपालका विभिन्न वामपन्थी दलहरूबीच सहकार्यको सम्भावना र राजनीतिक समीकरणबारे थप बहसको विषय बन्न सक्ने देखिन्छ।

कार्यक्रममा उनको भनाइ यस्तो थियो:

मलाई मानिसहरूले विभिन्न कोणबाट हेर्छन् । समाजमा मेरो विभिन्न चित्र बन्ने गरेको छ । मैले ‘क्रमभंग’ भनेँ भने ‘ल अब के उत्पात गर्न लाग्यो यसले’ भन्याजस्तो ठान्छन् । प्रकृतिको, मानव समाजको र मानव विकासको नियम हो निरन्तरतामा क्रमभंग । मैले त्यही भन्ने गर्छु । गरिराख्नु पर्ने हुन्छ क्रमभंग । तपाईँ यदि एउटै स्थानमा बसिराख्नुभयो भने जानुभयो । हाम्रा धेरै साथी बसिरहेका छन् । अहिले पनि घण्टी बजाएर नयाँ जनवाद भनिरहेका छन् । त्यसले कहीँ पनि लैजाँदैन ।

परिस्थिति फेरिएको छ । हामी पनि फेरिनुपर्छ । यसलाई गतिशीलता ठान्नुहुन्छ, परिवर्तनको बहावलाई बुझ्ने नेता भनेर मलाई ठान्नुहुन्छ भने थ्यांक यु भेरि मच । होइन, अर्को ठान्नुहुन्छ त्यो पनि ठीकै छ । म नै त्यस्तो नेता हो जसले जनयुद्धलाई शान्ति प्रक्रियामा ल्याउन कठोर मिहिनेत गर्‍यो । म नभएको भए हुँदैनथ्यो । अहिले फेरि सहकार्य र एकताको कुरा गर्नेतिर छौँ । मैले जे भनियो, भनियो भनेको भए प्रचण्ड पथ नै भइराख्थ्यो । तपाईँ हाम्रो भेटै हुन्थेन । मैले जस्तै परिस्थिति अनुसार आफूलाई परिमार्जन गर्ने क्षमताको विकास गर्नुपर्ने हुन्छ ।