काठमाडौँ । भोटेकोशी बाढीबाट प्रभावित नागरिकको खोजी, उद्धार, उपचार, राहत तथा पुनःस्थापनाका लागि राज्यका सबै संयन्त्र परिचालन गरिएको छ।

उद्धार तथा राहत कार्यमा सुरक्षाकर्मी अग्रपङ्क्तिमा रहेर अहोरात्र खटिएका छन्। रसुवा र नुवाकोटमा मात्रै चार हजार दुई सयभन्दा बढी नेपाली सेना परिचालन गरिएको छ।

त्यस्तै, नेपाल प्रहरी र सशस्त्र प्रहरी बल नेपालका सुरक्षाकर्मीसहित बाढी प्रभावित क्षेत्रमा खोजी, उद्धार तथा राहतका लागि करिब १५ हजार ४३१ सुरक्षाकर्मी परिचालन गरिएको छ।

सुरक्षाकर्मीले प्रभावित क्षेत्रमा बेपत्ता नागरिक तथा सम्पर्कविहीन व्यक्तिको खोजी, घाइतेको उद्धार तथा उपचारका लागि सहयोग, राहत सामग्री वितरण र जोखिममा रहेका नागरिकलाई सुरक्षित स्थानमा स्थानान्तरण गर्ने कार्यलाई निरन्तरता दिएका छन्।

सरकारले बाढीबाट प्रभावित नागरिकको तत्काल उद्धारसँगै राहत, उपचार र पुनःस्थापनाका कामलाई प्राथमिकतामा राखेर विभिन्न निकायबीच समन्वय गरी काम गरिरहेको जनाएको छ।

Originally published on abcnews.com.np.