काठमाडौं १६ असार । सभामुख डोलप्रसाद अर्यालले मुलुकको समृद्धि, सुशासन र भ्रष्टाचार अन्त्यका लागि राज्यका प्रमुख तीन अङ्गबीच कार्यगत एकता र गतिशीलता आवश्यक रहेको बताउनुभएको छ । 
६८ औं संसद दिवसको अवसरमा मंगलवार सिंहदरबारमा आयोजित कार्यक्रमलाई सम्बोधन गर्दै उहाँले यस्तो बताउनुभएको हो । सभामुख अर्यालले जनजीविका, राष्ट्रियता र समृद्ध राष्ट्र निर्माणको दिशामा सरकारलाई निरन्तर खबरदारी गर्न नागरिक समाज र सरोकारवालाहरूलाई आग्रह गर्नुभयो । नेपाल बस्न लायक मुलुक बन्यो, अब स्वदेश फर्किनुपर्छ भन्ने वातावरण सिर्जना गर्न सबै पक्षको सक्रियता आवश्यक रहेको बताउनु भयो । वैदेशिक रोजगारी र अन्य सिलसिलामा विश्वभर छरिएर रहेका नेपालीहरूलाई स्वदेश फर्किने आधार तयार गर्न नागरिकले झक्झक्याइरहनुपर्ने उल्लेख गर्नुभयो । उहाँले विकास र सुशासनको मार्गमा अनावश्यक प्रक्रियागत जटिलतामा अल्झिनु नहुने र भ्रष्टाचारमुक्त समाज निर्माणमा केन्द्रित हुनुपर्नेमा जोड दिनुभयो । अघिल्लो पुस्ताको अनुभव र नयाँ पुस्ताको प्रविधिमैत्री ज्ञानलाई एकीकृत गरेर मात्र मुलुकलाई द्रुतमार्गबाट विकासको दिशामा अगाडि बढाउन सकिने उहाँको तर्क छ । 
उहाँले भन्नुभयो, ‘आगामी दिनमा जनजीविकाको हकमा, राष्ट्रियताको हकमा, राष्ट्र निर्माणको विषयमा, समृद्ध राष्ट्र निर्माण गर्ने विषयमा, सुशासन कायम गर्ने विषयमा तथा भ्रष्टाचारको अन्त्य गर्ने विषयमा यहाँहरूले हामीलाई निरन्तर झकझक्याइरहनुपर्छ । कम्तीमा पनि अब नेपाल साँच्चिकै नेपाल बन्यो, नेपाल बस्नलायक बन्यो, हामी फर्किनुपर्छ भन्ने अनुभूति संसारभर विभिन्न देशमा बसिरहनुभएका नेपाली दाजुभाइ तथा दिदीबहिनीहरूमा जगाउने वातावरण निर्माण गर्न हामी सबै लाग्नुपर्छ । यहाँहरूले हामीले बोलाएका यस्ता कार्यक्रममा मात्र होइन, अन्य समयमा पनि आफ्ना सुझाव, सल्लाह र खबरदारी दिइरहनुपर्छ । त्यसका लागि यहाँहरूलाई अधिकार पनि छ, कर्तव्य पनि छ र जिम्मेवारी पनि छ । हामीलाई खोज्नु, प्रश्न गर्नु र खबरदारी गर्नु पनि यहाँहरूको दायित्व हो । हामी पनि यहाँहरूसँग निरन्तर सम्पर्कमा रहने प्रयास गर्नेछौँ । मलाई लाग्छ, मर्यादाका विषयमा यति धेरै बहस हुन्छ कि कहिलेकाहीँ विकासका मुद्दा, सुशासनका प्रश्न र भ्रष्टाचार नियन्त्रणका विषय ओझेलमा पर्ने गरेका छन् । त्यसैले हामीले अग्रजहरूलाई सधैँ सम्मान गर्दै आएको छौँ । मैले सार्वजनिक रूपमा पनि भन्ने गरेको छु–अघिल्लो पुस्ताले हामीलाई यो देशमा लोकतान्त्रिक अभ्यास गर्ने र उच्चस्तरको राजनीति गर्ने अवसर प्रदान गर्नुभएको हो । त्यसकारण उहाँहरूको सम्मान गर्दै उहाँहरूको अनुभवबाट हामीले सिक्नुपर्छ । त्यसैगरी, हामीभन्दा पछिल्लो पुस्ता, जसले हामीलाई पनि सिकाउन थालिसकेको छ, हामीभन्दा अझ अगाडि बढ्ने प्रयास गरिरहेको छ । प्रविधिको विकासले हाम्रा छोराछोरीलाई हामीभन्दा धेरै जान्ने, बुझ्ने र विश्व समाजलाई अझ गहिरो रूपमा बुझ्ने बनाइसकेको छ । त्यसैले अघिल्लो पुस्ताको अनुभव र पछिल्लो पुस्ताको नवीन सोच तथा क्षमतालाई सँगसँगै लिएर अगाडि बढ्न आवश्यक छ । हामीसँग रहेको देश निर्माणको हुटहुटी, देशलाई द्रुत गतिमा समृद्ध बनाउने चाहना तथा जनजीविकाका सवालमा प्रभावकारी ढङ्गले काम गर्ने सङ्कल्पलाई सफल बनाउन कार्यपालिका, न्यायपालिका र व्यवस्थापिका–यी तीनै अङ्गको गति र भावना एकआपसमा मिल्नुपर्छ भन्नेकुरा मैले पटक–पटक भन्ने गरेको छु । तर यस क्रममा संविधानलाई अक्षरशः पालना गर्दै, कानूनी राज्यको अवधारणालाई कुनैपनि रूपमा कमजोर हुन नदिई तथा विद्यमान संवैधानिक व्यवस्थाभित्र रहेर अघि बढ्नुपर्छ भन्ने कुरामा कुनै द्विविधा छैन ।’
सभामुख अर्यालले कार्यपालिका, न्यायपालिका र व्यवस्थापिकाको ‘स्पिड र स्पिरिट’ (गति र भावना) मिलेमा मात्र जनताको चाहनाअनुसारको परिणाममुखी काम गर्न सकिने उल्लेख गर्नुभयो । उहाँले संविधानको अक्षरशः पालना गर्दै कानूनी राज्यको अवधारणामा कुनै आँच नआउने गरी अगाडि बढ्नुपर्ने आवश्यकता औंल्याउनु भयो । मुलुकमा प्रिमियम क्लासको राजनीति गर्ने अवसर अघिल्लो पुस्ताले प्रदान गरेको स्मरण गर्दै उहाँले वर्तमान र भावी पुस्ताको क्षमतालाई कदर गर्दै राष्ट्र निर्माणमा लाग्नुपर्ने बताउनुभयो ।