काठमाडौं — राष्ट्रिय स्वतन्त्र पार्टी (रास्वपा) को पहिलो केन्द्रीय समिति बैठकले पार्टी संगठनलाई प्रभावकारी बनाउने उद्देश्यसहित विभिन्न महत्वपूर्ण निर्णय गरेको छ।

बुधबार नवनिर्वाचित पदाधिकारी तथा केन्द्रीय सदस्यहरूको शपथग्रहण लगत्तै बसेको बैठकले पहिलो महाधिवेशन सफल बनाउन सहयोग गर्ने सबैप्रति धन्यवाद ज्ञापन गर्ने निर्णय गरेको छ।

बैठकपछि सञ्चारकर्मीसँग कुरा गर्दै रास्वपाका सहमहामन्त्री हरि ढकाल ले पार्टीका विभिन्न संवैधानिक आयोगहरूको नेतृत्व चयन गरिएको जानकारी दिए। उनका अनुसार केन्द्रीय समितिले निर्वाचन आयोग, लेखा आयोग तथा अनुशासन आयोगको नेतृत्व टुंगो लगाएको हो।

निर्णयअनुसार निर्वाचन आयोग र लेखा आयोगमा साविककै नेतृत्वलाई निरन्तरता दिइएको छ भने अनुशासन आयोगको प्रमुखमा पूर्वन्यायाधीश लेखनाथ पौडेल नियुक्त भएका छन्। कास्की निवासी पौडेललाई पार्टीको अनुशासन आयोगको जिम्मेवारी दिने निर्णय बैठकले गरेको हो।

रास्वपाले महाधिवेशनपछि नयाँ नेतृत्वसहित पार्टी संगठनलाई थप सुदृढ बनाउने र आन्तरिक संरचनालाई व्यवस्थित गर्दै आगामी राजनीतिक गतिविधिलाई प्रभावकारी बनाउने लक्ष्यका साथ निर्णयहरू अघि बढाएको जनाएको छ।