काठमाडौं, १७ असार । नेपाल कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले पार्टी नेतृत्वले रणनीतिक लक्ष्यबाट विचलित हुँदै पद, पैसा र सत्तामुखी राजनीतिमा अल्झिएको स्वीकारेका छन्।

पोखरामा आयोजित पार्टी भेलालाई सम्बोधन गर्दै शान्ति प्रक्रिया र संविधान निर्माणलाई ऐतिहासिक उपलब्धि भए पनि त्यसअघि रणनीतिक सोच छाडेर तत्कालीन कार्यनीतिमै सीमित भएको उनको भनाइ छ।उनले भने, ‘शान्ति सम्झौता र संविधान निर्माण गरेर गल्ती भएन। तर, हामीले रणनीति छोड्यौँ, कार्यनीतिलाई नै रणनीति मान्न थाल्यौँ। चुनाव जित्ने, सरकारमा जाने, मन्त्री हुने र प्रधानमन्त्री हुने कुरामै सीमित भयौँ।’संविधान जारी भएपछि पार्टी नेतृत्व तात्कालिक स्वार्थमा केन्द्रित भएको बताए।उनले थपे, ‘हिजो हामी जनताको अधिकारका लागि तँछाडमछाड गर्थ्यौं पछि पद, सुविधा र पैसा प्राप्तिका लागि तँछाडमछाड गर्न थाल्यौँ। नेतृत्वकै कमजोरीका कारण कार्यकर्तामा पनि त्यही प्रवृत्ति फैलियो।

गल्ती माथिबाटै भयो। नेतृत्व पटक–पटक प्रधानमन्त्री बन्न कहिले कांग्रेस, कहिले एमाले र कहिलेकाहीँ अन्य दलसँग मिल्यो। त्यसको असर तलसम्म पुग्यो।’उनले पार्टीभित्र समाजवादी मूल्य कमजोर बन्दै व्यक्तिवाद, स्वार्थ र अवसरवाद हाबी भएको बताए। उनले भन्नका लागि समाजवाद भने पनि व्यवहारमा पुँजीवादी, व्यक्तिवादी र स्वार्थी कामका केन्द्रीय भएको स्वीकारे।उनले थपे, ‘जनताले हामीलाई पहिला कम्युनिष्टबाट ठूलै चिज प्राप्त हुन्छ भन्ने सोचेको थिए। तर जनताले हामीलाई कांग्रेस, एमालेभन्दा अझ बढी पद र प्रतिष्ठाका निमित्त, पैसाका निमित्त जे पनि गर्ने देखेँ।’