काठमाडौं— जेनजी अभियन्ता माजिद अन्सारी प्रहरीको कुटपिटबाट घाइते भएको आरोप लागेको छ। टाउको र अनुहारमा चोट लागेपछि उनलाई शनिबार राति उपचारका लागि त्रिभुवन विश्वविद्यालय शिक्षण अस्पताल लगिएको जनाइएको छ।

गए राति बागमती नदीमा आएको बाढीका कारण कीर्तिपुरस्थित होल्डिङ सेन्टर डुबानमा परेपछि त्यहाँ राखिएका सुकुम्बासीहरू प्रभावित भएका थिए। प्रभावितलाई सहयोग गर्न पुगेका अन्सारीसहित जेनजी अभियन्ता नहेन्द्र खड्का र सरिश्मा थापालाई प्रहरीले नियन्त्रणमा लिएको थियो। खड्का र थापालाई भने पछि रिहा गरिएको छ।

जेनजी अभियन्ता तनुजा पाण्डेका अनुसार पक्राउ गर्ने क्रममा प्रहरीले अन्सारीमाथि कुटपिट गरेको थियो। उनका अनुसार प्रारम्भिक जानकारीअनुसार प्रहरीको बुटले टाउको र अनुहारमा प्रहार गर्दा अन्सारीको अनुहार तथा शरीरको माथिल्लो भागमा गम्भीर चोट लागेको छ।

सामाजिक सञ्जालमार्फत पाण्डेले अन्सारीलाई तत्काल उपचारका लागि त्रिवि शिक्षण अस्पताल लगिएको जानकारी दिएकी छन्।

यस घटनाप्रति नेपाल जेनजी फ्रन्टले प्रेस विज्ञप्ति जारी गर्दै प्रहरीको व्यवहारको भर्त्सना गरेको छ। संगठनले घाइते अन्सारीको प्रभावकारी उपचारको व्यवस्था गर्न तथा घटनाको निष्पक्ष छानबिन गर्न सम्बन्धित निकायसँग माग गरेको छ।

यस विषयमा नेपाल प्रहरीले भने औपचारिक प्रतिक्रिया सार्वजनिक गरेको छैन। प्रहरीको धारणा प्राप्त भएमा समाचार अद्यावधिक गरिनेछ।