काठमाडौँ : काठमाडौँको माइतीघरमा सुकुमवासीहरूको उचित व्यवस्थापनको माग गर्दै आज बृहत् प्रदर्शन गरिएको छ। संयुक्त राष्ट्रिय सुकुमवासी मोर्चाको आयोजनामा सरोकारवाला तथा सुकुमवासी नागरिकहरूले सरकारविरुद्ध सडक प्रदर्शन गरेका हुन्।

भूमिहीन तथा सुकुमवासीहरूको समस्या समाधान गर्न सरकारले लामो समयदेखि उदासीनता देखाएको भन्दै प्रदर्शनकारीहरूले आक्रोस पोखेका छन्। उचित विकल्प र स्थायी व्यवस्थापन विना सुकुमवासी बस्तीहरू हटाउन खोजिएको भन्दै उनीहरूले सुरक्षित बसोबासको हक सुनिश्चित गर्न माग गरे।

प्रदर्शनका क्रममा मोर्चाले आन्दोलनमा संलग्न केही व्यक्तिहरूलाई प्रहरीले पक्राउ गरेको विषयमा समेत कडा विरोध जनाएको छ। पक्राउ परेका सुकुमवासी अभियन्ताहरूलाई विना कुनै सर्त तत्काल रिहा गरिनुपर्ने उनीहरूको मुख्य माग रहेको छ। सरकारले दमन गरेर आन्दोलन दबाउन खोजेको भन्दै प्रदर्शनकारीहरूले पक्राउ परेकाहरूलाई रिहा नगरे आन्दोलनलाई थप चर्काउने चेतावनी दिएका छन्।

माइतीघर मण्डलामा भेला भएका प्रदर्शनकारीहरूले प्लेकार्ड र नाराबाजीसहित परिक्रमा गरेका थिए, जसका कारण केही समय सो क्षेत्रको सवारी आवागमन समेत प्रभावित बनेको थियो। प्रदर्शनमा काठमाडौँ उपत्यकाका विभिन्न सुकुमवासी बस्तीका बासिन्दाहरूको बाक्लो उपस्थिति रहेको थियो।