काठमाडौं ३२ असार । उच्च अदालत जनकपुरले आर्थिक वर्ष २०८२–०८३ मा लक्ष्यभन्दा बढी मुद्दा फर्स्यौट गरेको छ । 
अदालतले तोकेको वार्षिक लक्ष्यको तुलनामा १०१.६० प्रतिशत प्रगति हासिल गरेको हो । अदालतको तथ्याङ्कअनुसार गत आर्थिक वर्षमा जिम्मेवारी सरेर आएका २ हजार २ सय ६७ र नयाँ दर्ता भएका ४ हजार २ सय ४९ गरी कुल ६ हजार ५ सय १६ मुद्दा रहेका थिए । तीमध्ये ७०.८८ प्रतिशत अर्थात ४ हजार ६ सय १९ मुद्दा फस्र्यौट भइसकेको अदालतका कायममुकायम मुख्य न्यायाधीश टेकनारायण कुँवरले जानकारी दिनुभयो । हाल १ हजार ८९७ मुद्दा मात्र विचाराधीन अवस्थामा रहेका छन् । विशेष गरी पुराना मुद्दा फस्र्यौटलाई प्राथमिकतामा राखेर रणनीतिक योजनाका साथ कार्यसम्पादन गरिएकाले १८ महिना तथा दुई वर्ष नाघेका सबै मुद्दाहरू शुन्यमा झार्न सफल भएको अदालतले जनाएको छ ।  
चालु आर्थिक वर्षका लागि अदालतले ४ हजार ५४६ मुद्दा फैसला गर्ने लक्ष्य निर्धारण गरेको थियो । तर कार्यसम्पादनमा प्रभावकारिता ल्याउँदै निर्धारित लक्ष्यभन्दा बढी अर्थात ४ हजार ६१९ मुद्दा फस्र्यौट गरिएको छ । अदालतले आगामी आर्थिक वर्षमा ६ हजार ८२६ नयाँ मुद्दा दर्ता हुनसक्ने अनुमान गरेको छ ।