काठमाडौं, १ साउन । देशभर मनसुनी प्रणाली सक्रिय रहेकाले आज (शुक्रबार) पनि विभिन्न प्रदेशमा भारी वर्षाको सम्भावना रहेको छ। जल तथा मौसम विज्ञान विभागले विशेषगरी वाग्मती, गण्डकी, लुम्बिनी, कोसी र कर्णाली प्रदेशका केही स्थानमा भारी वर्षा हुने पूर्वानुमान गर्दै सतर्क रहन आग्रह गरेको छ।

विभागका अनुसार दिउँसो पहाडी भूभाग, कोसी, वाग्मती, गण्डकी र कर्णाली प्रदेशका हिमाली क्षेत्र तथा लुम्बिनी प्रदेशको तराईका एक–दुई स्थानमा भारी वर्षा हुन सक्छ। रातिको समयमा पनि वाग्मती, गण्डकी र लुम्बिनी प्रदेशका पहाडी तथा तराई क्षेत्रमा मेघगर्जन र चट्याङसहित भारी वर्षाको सम्भावना रहेको छ।

देशभर सामान्यदेखि पूर्ण बदली रहने अनुमान गरिएको छ। पहाडी क्षेत्रका अधिकांश स्थानमा तथा तराईका विभिन्न क्षेत्रमा मेघगर्जन, चट्याङसहित मध्यम वर्षा हुने सम्भावना छ भने हिमाली क्षेत्रमा वर्षासँगै हिमपात पनि हुन सक्ने विभागले जनाएको छ।

लगातारको वर्षाका कारण नदी तथा खोलामा पानीको बहाव बढ्न थालेको छ। भक्तपुरस्थित हनुमन्ते खोला र काभ्रेपलाञ्चोकको रोशी खोलामा बाढीको सतह बढिरहेको भन्दै आसपासका बासिन्दालाई उच्च सतर्कता अपनाउन आग्रह गरिएको छ।

विभागका अनुसार हाल देशभर मनसुनी वायुको प्रभाव कायम छ। मनसुनको न्यूनचापीय रेखा पश्चिम नेपालमा औसतभन्दा केही माथि र पूर्वी क्षेत्रमा औसत स्थान आसपास रहेकाले धेरै स्थानमा वर्षा भइरहेको हो।

निरन्तर वर्षाका कारण केही नदीमा बाढीको जोखिम बढेको छ भने विभिन्न सडकखण्डमा पहिरो र अवरोधसमेत देखिएको छ। विभागले नदी किनार, डुबान हुने क्षेत्र तथा पहिरोको जोखिम भएका स्थानका बासिन्दालाई आवश्यक सतर्कता अपनाउन आग्रह गरेको छ।