काठमाडौं । विश्वप्रसिद्ध नेपाली पर्वतारोही निर्मल पुर्जा (निम्स दाइ) को निधनप्रति श्रद्धाञ्जली व्यक्त गर्दै म्याग्दीको अन्नपूर्ण गाउँपालिका ले सोमबार सार्वजनिक शोक बिदा घोषणा गरेको छ।

गाउँपालिका अध्यक्ष भरतकुमार पुन ले जारी गरेको सूचनाअनुसार साउन १८ गते सोमबार अत्यावश्यक सेवाबाहेक गाउँपालिकाअन्तर्गतका सबै कार्यालय, वडा कार्यालय, स्वास्थ्य संस्था तथा सामुदायिक विद्यालय बन्द रहनेछन्।

सूचनामा पाकिस्तानको ब्रोड पिक आरोहणका क्रममा गएको हिमपहिरोमा परी निर्मल पुर्जासहित १० जना आरोहीको निधन भएको घटनाप्रति गहिरो दुःख व्यक्त गरिएको छ।

गाउँपालिकाले निर्मल पुर्जाले नेपालको पर्वतारोहण क्षेत्रलाई विश्वमञ्चमा नयाँ उचाइमा पुर्‍याएको, नेपाली पर्वतारोहीको पहिचानलाई अन्तर्राष्ट्रिय रूपमा स्थापित गरेको तथा साहस, नेतृत्व र समर्पणको अनुपम उदाहरण प्रस्तुत गरेको उल्लेख गर्दै उनको योगदान सधैं स्मरणीय रहने जनाएको छ।

उता, पाकिस्तानमा दुर्घटनामा परेका आरोहीहरूको शव सुरक्षित रूपमा तल ल्याउने उद्धार अभियान जारी रहेको छ। उद्धार टोलीले शवहरू क्रमशः क्याम्प–१ तर्फ ल्याइरहेको र मौसम अनुकूल भए हेलिकोप्टरमार्फत थप उद्धार गरिने तयारी भइरहेको जनाइएको छ।

Originally published on abcnews.com.np.