काठमाडौं । लुम्बिनी सांस्कृतिक नगरपालिका–१० महिलवारका स्थानीय महिलालाई गहुँको छ्वाली (परालको माथिल्लो भाग) बाट कलात्मक सामग्री निर्माण गर्न तीन महिने उन्नत हस्तकला तालिम सुरु गरिएको छ।

लुम्बिनी विकास कोष र युएनडिपीको सहयोगमा सञ्चालन भएको तालिमको उद्देश्य खेर जाने कृषि अवशेषलाई आयआर्जनको माध्यम बनाउँदै स्थानीय महिलालाई उद्यमशील बनाउनु हो।

यसअघि सम्पन्न १५ दिने आधारभूत तालिमपछि सहभागीको उत्साह र उपलब्धिलाई मध्यनजर गर्दै दोस्रो चरणको उन्नत तालिम सञ्चालन गरिएको हो। ३५ वर्षभन्दा बढी अनुभव भएका प्रशिक्षक सीताराम गोसाईंले ‘थ्री–डी’ प्रविधिमार्फत बुद्धका आँखा, धर्मचक्र, गौतम बुद्धको शीर, मायादेवी मन्दिर र बुद्धको बज्रजस्ता कलाकृति बनाउन प्रशिक्षण दिइरहेका छन्।

प्रशिक्षक गोसाईंले लुम्बिनीका उपहार पसलमा विदेशी सामग्रीको बाहुल्यता रहेको उल्लेख गर्दै स्थानीय स्रोतबाट निर्मित हस्तकलाले लुम्बिनीको मौलिक पहिचान प्रवर्द्धन गर्ने बताए। उनले विगतमा जलाइने गहुँको छ्वालीलाई अब आर्थिक आम्दानीको स्रोतमा रूपान्तरण गर्न सकिने बताए।

तालिममा सहभागी निर्मला चौधरीले आधारभूत तालिमपछि नै पाँच सयदेखि एक हजार दुई सय रुपैयाँसम्मका सामग्री बिक्री गर्न सफल भएको बताउँदै यसले घरमै बसेर आत्मनिर्भर बन्ने आत्मविश्वास बढाएको सुनाइन्। सहभागीहरूले गहुँको छ्वालीबाट बुद्धसम्बन्धी विभिन्न कलाकृति बनाउन सिकिरहेको बताएका छन्।

तालिममा छ्वाली सङ्कलन, प्रशोधन, संरक्षण तथा दीर्घकालीन रूपमा प्रयोगयोग्य बनाउने प्रविधिसमेत सिकाइँदैछ। लुम्बिनी भ्रमणमा आउने पर्यटकका लागि स्थानीय उत्पादनलाई आकर्षक कोसेलीका रूपमा विकास गर्ने लक्ष्यसहित कार्यक्रम सञ्चालन गरिएको आयोजकले जनाएको छ।

आयोजकका अनुसार यस तालिमले महिलालाई स्वरोजगारतर्फ उन्मुख गराउनुका साथै लुम्बिनीको सांस्कृतिक तथा धार्मिक पहिचानलाई हस्तकलामार्फत अन्तर्राष्ट्रिय स्तरमा प्रवर्द्धन गर्न योगदान पुग्ने अपेक्षा गरिएको छ।

Originally published on abcnews.com.np.