रोल्पा — रोल्पाको जलजला हरेक ऋतुमा नयाँ रूपमा देखिन्छ । अहिले यो क्षेत्र दुर्लभ फूलहरूले सिँगारिएको छ । समुद्री सतहदेखि २,२०० मिटरदेखि ३,८०० मिटर उचाइमा फैलिएको जलजला रोल्पा नगरपालिका, सुनछहरी गाउँपालिका र थबाङ गाउँपालिकाको संगममा अवस्थित छ ।
पर्यटकीय आकर्षण
नेपाल सरकारले भ्रमण वर्ष २०२० का लागि तय गरेको एक सय गन्तव्यमा समावेश जलजलामा अहिले जमिन कपासमा टेके जस्तो लाग्छ, पानी नै पानीले भरिएको जस्तो महसुस हुन्छ । अगाडि निलो आकाशमुनि हरिया थुम्काहरू देखिन्छन् । सेतो गुराँस, लालीगुराँस र सयौं बुकी फूलहरूले जलजलालाई झनै सुन्दर बनाएको छ । फूलमा रमाएका चराहरूको चिरबिर आवाजले जलजला गुञ्जायमान छ ।
जैविक विविधता
जलजलामा घोरल, थार, मृग, बँदेल, भालु, डाँफे, मुनाल, कालिज, बाघलगायत जङ्गली जनावर र पक्षी भेटिन्छन् । धुपी, बाँज, सेतो गुराँस, लालीगुराँस, भोजपत्र, लेकाली सल्लालगायत वनस्पति तथा थुप्रै जडीबुटी पनि यहाँ पाइन्छ । युद्धकालदेखि नै यहाँ बस्तुभाउ चरिचरनमा बन्देज लगाई संरक्षण गरिँदै आएको छ ।
धार्मिक र ऐतिहासिक महत्त्व
हरेक वर्ष बैशाख, जेठ र साउने पूर्णिमाको अवसरमा जलजलामा भव्य पूजा हुन्छ । पूजामा रोल्पासँगै छिमेकी जिल्ला रुकुम, सल्यान, प्युठान, दाङ र बागलुङबाट समेत भक्तजन र पर्यटक आउँछन् ।
जलजलामा विभिन्न मार्गहरूबाट पुग्न सकिन्छ । राष्ट्रिय प्रकृति संरक्षण कोषले पदमार्गमा सहजताका लागि ठाउँ–ठाउँमा साइनबोर्ड राखेको छ ।
चारै ऋतुको दृश्य
जलजलाको दृश्य शब्द र तस्वीरले मात्रै वर्णन हुँदैन । फागुन, चैत, वैशाखमा लालीगुराँसले ढकमक्क हुन्छ भने हिउँदमा सेतै हिउँले ढाकिन्छ । असार, साउन, भदौ र असोजमा दुर्लभ फूलहरूले सिँगारिन्छ ।
Originally published on abcnews.com.np.
प्रतिक्रिया दिनुहोस्