काठमाडौं । नेपाल न्याय सेवाका दुई महत्वपूर्ण पद—न्यायपरिषद् सचिव र सर्वोच्च अदालतको रजिष्ट्रार—मा नियुक्तिका लागि चार वरिष्ठ अधिकारीबीच प्रतिस्पर्धा हुने भएको छ।

उच्च अदालतमा नियुक्तिपछि रिक्त रहेको न्यायपरिषद् सचिव र प्रमुख निर्वाचन आयुक्त नियुक्त भएपछि खाली भएको सर्वोच्च अदालतको रजिष्ट्रार पदमा न्याय सेवा आयोगले चाँडै सिफारिस गर्ने तयारी गरेको हो।

स्रोतका अनुसार फैसला कार्यान्वयन निर्देशनालयका महानिर्देशक गजेन्द्रबहादुर सिंह, सर्वोच्च अदालतका सहरजिष्ट्रार ठगिन्द्र कट्टेल, न्यायपरिषद्का निमित्त सचिव रामप्रसाद भट्टराई र सर्वोच्चकै सहरजिष्ट्रार बाबुराम दाहालमध्येबाट दुई जनालाई नियुक्तिका लागि सिफारिस गरिनेछ।

चारै जना २०७४ साल जेठ १९ गते एकैदिन सहरजिष्ट्रार पदमा बढुवा भएका अधिकारी हुन्। आयोगले कार्यसम्पादन मूल्यांकन, वरिष्ठता र योग्यताका आधारमा सिफारिस गर्ने तयारी गरेको जनाएको छ।

प्रधानन्यायाधीशको अध्यक्षतामा रहने न्याय सेवा आयोगमा कानुनमन्त्री, सर्वोच्च अदालतका वरिष्ठतम् न्यायाधीश, लोक सेवा आयोगका अध्यक्ष र महान्यायाधिवक्ता सदस्य रहने व्यवस्था छ। आयोगको सिफारिसपछि न्यायपरिषद् सचिव र सर्वोच्च अदालतको रजिष्ट्रार नियुक्त हुनेछन्।

Originally published on abcnews.com.np.