विराटनगर । मोरङको विराटनगरस्थित प्रतिष्ठित औद्योगिक घराना देवनारा मुन्दडा परिवारको निवासमा नेपाल प्रहरीले विशेष सूचनाका आधारमा व्यापक खानतलासी गरेको छ। तर, करिब चार घण्टासम्म चलेको खोजतलासपछि कुनै गैरकानुनी सामग्री फेला नपरेपछि प्रहरी रित्तै हात फर्किएको छ।

सोमबार बिहान करिब ५ बजेदेखि प्रहरीले घर, कार्यालय, गोदाम र अन्य संरचनामा खानतलासी गरेको थियो। जिल्ला प्रहरी कार्यालय मोरङका अनुसार प्राप्त गोप्य सूचनाका आधारमा कानुनी प्रक्रिया पूरा गरेर खोजतलास गरिएको भए पनि सूचनाअनुसारको कुनै सामग्री फेला नपरेको र थप अनुसन्धान जारी रहेको छ।

खानतलासीपछि मुन्दडा परिवारले प्रहरीले सम्पूर्ण प्रक्रिया पूरा गरी केही पनि फेला नपारेको र “क्लिन चिट” दिएर फर्किएको जनाएको छ। परिवारले आफूहरूले अनुसन्धानमा पूर्ण सहयोग गरेको पनि बताएका छन्।

घटनापछि विराटनगरका उद्योगी–व्यवसायीले भने अनुसन्धानको शैलीप्रति असन्तुष्टि जनाएका छन्। उनीहरूले कुनै प्रमाणबिनै ठूलो संख्यामा प्रहरी परिचालन गरी प्रतिष्ठित व्यवसायीको घरमा छापा मार्ने कार्यले निजी क्षेत्रमा त्रास फैलाएको र लगानीको वातावरणमा नकारात्मक सन्देश गएको बताएका छन्।

देवनारा समूहले जेजे ज्वेलर्स, बाबा रिफाइनरी, हिमगिरि सोप, हाइलाइफ चप्पललगायत विभिन्न उद्योग सञ्चालन गर्दै आएको छ भने समूह विराटनगरको स्थापित औद्योगिक घरानामध्ये एक मानिन्छ।

Originally published on abcnews.com.np.