बागलुङ । काठेखोला गाउँपालिकाले स्थानीय नागरिकलाई न्यायिक समितिको सेवा, प्रक्रिया र अधिकारबारे सहज जानकारी उपलब्ध गराउने उद्देश्यले ‘न्यायिक सन्देश’ नामक पुस्तक प्रकाशित गरेको छ।

सोमबार आयोजित कार्यक्रममा गाउँपालिका अध्यक्ष राजु थापा, उपाध्यक्ष तेजबहादुर थापा, प्रमुख प्रशासकीय अधिकृत मुक्ति पौडेल तथा वडा अध्यक्षहरूले संयुक्त रूपमा पुस्तक विमोचन गरेका हुन्।

अध्यक्ष थापाले पुस्तकले न्यायिक समितिको कार्यसम्पादनलाई अभिलेखीकरण गर्नुका साथै आगामी दिनमा न्याय सम्पादनलाई थप प्रभावकारी बनाउन सहयोग पुग्ने बताए।

पुस्तकमा गत वैशाखमा आयोजित तेस्रो न्यायिक सम्मेलन र बेलढुंगा घोषणापत्र, स्थानीय सरकार सञ्चालन ऐनअनुसार न्यायिक समितिको अधिकार तथा निवेदन, प्रतिउत्तर, म्याद तामेली, वकपत्रलगायतका आवश्यक ढाँचाहरू समावेश गरिएको छ।

न्यायिक समितिका संयोजक तथा उपाध्यक्ष तेजबहादुर थापाले पुस्तकले न्यायिक प्रक्रिया बुझ्न र सेवा लिन चाहने सर्वसाधारणलाई उपयोगी मार्गदर्शकका रूपमा काम गर्ने विश्वास व्यक्त गरे।

यसका साथै पुस्तकमा बागलुङ जिल्लाका १० वटै स्थानीय तहमा दर्ता भएका मुद्दाको विवरण, मेलमिलापकर्ताको नाम र शैक्षिक योग्यता, न्यायिक समिति सम्बन्धी लेख, तथ्यांक तथा कविता समेत समेटिएको छ।

पुस्तकमा गण्डकी प्रदेशका मुख्यमन्त्री सुरेन्द्रराज पाण्डे, नेपाल सरकारका महान्यायाधिवक्ता नारायणदत्त कँडेल तथा गण्डकी प्रदेशका मुख्य न्यायाधिवक्ता चिरञ्जीवी शर्मा पौडेल का शुभकामना सन्देश पनि समावेश गरिएको छ।

कार्यक्रममा न्यायिक सम्मेलन सफल बनाउन सहयोग गर्ने स्वयंसेवक, नेपाल स्काउट तथा विभिन्न उपसमितिका पदाधिकारीलाई सम्मान समेत गरिएको गाउँपालिकाले जनाएको छ।

Originally published on abcnews.com.np.