काठमाडौं । भृकुटीमण्डपस्थित काठमाडौं उपत्यका सार्वजनिक पुस्तकालयमा समाज कल्याण परिषद्ले ताल्चा लगाएको ११२औँ दिन सोमबार नेविसंघले पुस्तकालय अगाडि प्रदर्शन गर्दै तत्काल सञ्चालनमा ल्याउन माग गरेको छ।

नेपाल विद्यार्थी संघ (नेविसंघ) केन्द्रीय समितिले ‘सार्वजनिक पुस्तकालय बचाऔँ’ भन्ने नारासहित प्लेकार्ड प्रदर्शन गर्दै पुस्तकालय बन्द हुँदा विद्यार्थी, अनुसन्धानकर्ता र पाठकवर्ग प्रत्यक्ष रूपमा प्रभावित भएको जनाएको छ।

कार्यक्रममा साहित्यकार तथा नेपालयका सम्पादक विमल आचार्य ले काठमाडौं उपत्यका सार्वजनिक पुस्तकालय लामो समयदेखि अध्ययन र अनुसन्धानको महत्वपूर्ण केन्द्र रहेको उल्लेख गर्दै यसमा ताल्चा लगाउनु सयौँ विद्यार्थी अध्ययन गरिरहेको विद्यालय बन्द गर्नुजस्तै भएको बताए।

उनले पुस्तकालयमा रहेका दुर्लभ पुस्तकहरूको संरक्षण गर्नुको सट्टा पुस्तकालय नै बन्द गरिनु दुःखद भएको टिप्पणी गरे।

जेन्जी अभियन्ता मोनिका निरौला ले पुस्तकालयले आफूलाई ज्ञान र सोच विकासमा महत्वपूर्ण भूमिका खेलेको उल्लेख गर्दै पुस्तकालयमा लागेको ताल्चाले ज्ञान, विचार र विद्यार्थीको भविष्यमा समेत असर पुगेको बताइन्।

नेविसंघकी सभापति करुणा कटुवाल ले सार्वजनिक पुस्तकालय तत्काल सञ्चालनमा ल्याउनुपर्ने माग गर्दै पुस्तकालय खोल्ने अभियानलाई निरन्तर अघि बढाइने बताइन्।

समाज कल्याण परिषद्ले पुस्तकालयमा ताल्चा लगाएपछि त्यसको विरोधमा विभिन्न साहित्यिक, शैक्षिक र नागरिक क्षेत्रका व्यक्तिहरूले निरन्तर आवाज उठाउँदै आएका छन्।

Originally published on abcnews.com.np.