काठमाडौँ — काठमाडौँको गोकर्णस्थित वाग्मती करिडोर विस्तारका क्रममा राष्ट्रिय स्वतन्त्र पार्टी (रास्वपा) का सांसद राजु पाण्डे र नेपाली सेनाका एक अधिकारीबीच भएको चर्काचर्कीको भिडियो सामाजिक सञ्जालमा भाइरल भएको छ। तर, सांसद पाण्डेले आफूले सेनाको सिमा नमिचेको र अपमान नगरेको स्पष्टीकरण दिएका छन्।
गोकर्णस्थित नेपाल ट्रस्टको जग्गामा रहेको सेनाको विपद् व्यवस्थापन तालिम केन्द्रको पर्खाल करिडोर विस्तारका क्रममा डोजरले भत्काउन लाग्दा सोमबार सांसद पाण्डे र सैनिक अधिकारीबीच विवाद भएको थियो। सामाजिक सञ्जालमा भाइरल भएको भिडियोमा सैनिकले ‘यहाँ फौज बसेको छ, अनुमति पत्र खै ?’ भन्दै रोक्न खोजेको र सांसद पाण्डेले ‘करिडोरको मापदण्ड सबैलाई लाग्छ, यो डोजर रोकिँदैन’ भनेको सुनिन्छ।
यस घटनापछि सांसद पाण्डेले आफ्नो धारणा राख्दै भने, ‘म त्यहाँ एक्लै डोजर लिएर गएको थिइनँ। करिडोर खोल्ने मुख्य जिम्मेवारी अधिकार सम्पन्न वाग्मतीकै हो।’ उनका अनुसार काम सुरु हुनुभन्दा करिब आधा घण्टा अगाडि नै अधिकार सम्पन्न वाग्मतीका आनन्द रानाभाटलाई सेनासँग समन्वय गर्न पठाइएको थियो। सुरुवातमा कुनै अवरोध नभएको र डोजर समेत चलिसकेको अवस्थामा एकजना क्याप्टेन एक्कासी आएर विवाद गर्न थालेको उनको भनाइ छ।
‘उहाँले मलाई फोन गरेर वा साइडमा बोलाएर कुरा गरेको भए हुन्थ्यो। त्यहाँ उपस्थित सम्बन्धित निकायका अधिकारीहरूलाई सोधेको भए पनि हुन्थ्यो। तर उहाँ सिधै भिडमा पस्नुभयो,’ पाण्डेले भने, ‘स्थानीय जनताको बाक्लो उपस्थिति थियो। काम सुरु भइसकेको अवस्थामा एक्कासी रोक्दा झन् ठूलो विवाद हुने स्थिति थियो। त्यसैले मैले भनेँ — क्याप्टेन सा’ब, तपाईंले आफ्नो अथरिटीमा सोध्नुस्, तर अब यो काम रोकिन्न।’
पाण्डेले आफू पनि सैनिक पृष्ठभूमिबाट आएकाले ड्युटीमा खटिएका अफिसरलाई सम्मान गर्न जान्ने बताउँदै अपमान नगरेको दाबी गरे। ‘मैले उहाँलाई अपमान गरेको होइन, परिस्थितिको गाम्भीर्यता बुझाउन खोजेको मात्र हुँ,’ उनले भने।
उनका अनुसार, चर्काचर्की भएको दुई मिनेटमै त्यो युनिट हेर्ने कर्णेल गंगा बराल आइपुगेपछि सेनाको आफ्नै च्यानलबाट कुरा मिल्यो। ‘उहाँहरूकै सहयोग र समन्वयमा बाटो खोल्ने काम विना कुनै अवरोध सम्पन्न भयो। सेनाले हामीलाई काममा सहयोग नै गरेको थियो,’ पाण्डेले जानकारी दिए।
सामाजिक सञ्जालमा आधा भिडियो मात्रै भाइरल भएपछि आफूविरुद्ध भ्रम सिर्जना गरिएको पाण्डेको आरोप छ। ‘मैले सांसदको मर्यादा भुलेर सिमा मिचेको, सेनालाई हप्काएको भनेर जुन प्रश्न उठिरहेको छ, त्यसमा कुनै सत्यता छैन,’ उनले भने, ‘सम्बन्धित निकायका प्रमुखहरूकै उपस्थितिमा काम भइरहेको बेला मैले सिमा मिच्ने कुरै आउँदैन।’
Originally published on abcnews.com.np.
प्रतिक्रिया दिनुहोस्