विराटनगर । औद्योगिक नगर विराटनगरका प्रतिष्ठित उद्योगी प्रकाश मुन्दडाको घरमा बहुमूल्य सामान राखेको लिखित उजुरीका आधारमा छापा मारिएको प्रहरीले प्रस्ट्याएको छ ।

छापा मार्दा प्रहरीले केही प्रमाण फेला नपारी रित्तो हात फर्कँदा मुलुकको गृह प्रशासनको विश्वसनीयताप्रति चौतर्फी आलोचना भएपछि कोशी प्रदेश प्रहरी कार्यालयले मोरङका प्रहरी प्रमुख प्रहरी उपरीक्षक (एसपी) कवित कटवाललाई २४ घण्टे स्पष्टीकरण सोधेको छ ।

साताअघि प्रदेश प्रहरी प्रमुखका रूपमा कोशी प्रदेशको राजधानी विराटनगर आएका डीआईजी शेखर खनालले मंगलबार नेपाल उद्योग वाणिज्य महासंघ कोशी, नेपाल उद्योग परिसंघ कोशी, उद्योग संगठन मोरङ, मोरङ उद्योग व्यापार संघ र विराट व्यापार संघका पदाधिकारीसँग चिनजानसहितको छलफल गर्दै त्यस्तो स्पष्टीकरण दिएका हुन् । तर, उनले उद्योगी व्यवसायी मुन्दडाको घरमा सुन, चाँदी, नगद वा कुन बहुमूल्य सामान राखिएको भन्ने खुलाएनन् ।

छलफलमा सहभागी एक उद्योगीका अनुसार मुन्दडाको घरमा बहुमूल्य सामान लुकाएर राखेको नाम र नम्बरसहितको लिखित उजुरी परेपछि प्रहरी छापा मार्न बाध्य भएको डीआईजी खनालले बताए । तर, उनले त्यो कुन र कस्तो बहुमूल्य सामान हो भन्नेबारे खुलाएनन् ।

ती उद्योगीका अनुसार डीआईजी खनालले घुमाउरो भाषामा मुन्दडाको घरमा ठूलो परिमाणमा नगदसहित सुन र चाँदी लुकाएर राखेको उजुरी परेकोतर्फ संकेत गरेका थिए ।

छलफलमा नेपाल उद्योग वाणिज्य महासंघ कोशीका अध्यक्ष राजेन्द्र राउत, नेपाल उद्योग परिसंघ कोशीका अध्यक्ष पवनकुमार सारडा, मोरङ उद्योग व्यापार संघका अध्यक्ष अनुपम राठी र उद्योग संगठन मोरङका अध्यक्ष नन्दकिशोर राठीसहित पीडित उद्योगी प्रकाश मुन्दडा लगायतका उद्योगी व्यवसायी सहभागी थिए ।

प्रकाश मुन्दडा उद्योग परिसंघ कोशीका उपाध्यक्ष र निजी क्षेत्रको जेठो संस्था मोरङ उद्योग व्यापार संघका पूर्वअध्यक्ष हुन् । उनीहरू सबै एकाघरमा बस्छन् । प्रहरीले उद्योगी प्रकाशको घरमा नभई उनका काका बेनीगोपालको घरमा छापा मारेको दाबी गरेको छ ।

मुन्दडा परिवारको नेपालकै सबैभन्दा ठूलो चाँदी उद्योग जेजे ज्वेलर्ससहित हिमगिरि सोप, बाबा रिफाइनरी, मारुती रिफाइनरी, हाइलाइफ चप्पल लगायतका उद्योग छन् । यो परिवारले सीता एअरमार्फत हेलिकोप्टरबाट हवाई सेवाको व्यवसाय पनि गर्दै आएको छ । त्यस्तै विराटनगरको सेन्ट्रल मलको सञ्चालक रहेको मुन्दडा परिवार घरजग्गाको कारोबारमा पनि संलग्न छ ।

छापा तथा अनुसन्धानात्मक कारबाहीअघि प्रयोग गरिने सूचना संयन्त्रको विश्वसनीयता र प्रामाणिकतामाथि गम्भीर पुनरावलोकन गर्न, अपुष्ट सूचनाका आधारमा गरिने कारबाहीबाट निर्दोष उद्योगी-व्यवसायीको सामाजिक प्रतिष्ठा र व्यावसायिक साखमा असर पुग्नका साथै यस्ता आधारहीन क्रियाकलापले राष्ट्रको अर्थतन्त्रमा दूरगामी असर पर्ने भन्दै उद्योगीहरूले ध्यानाकर्षण गराएका छन् । अब त्यस्तो गल्ती नदोहोरिने डीआईजीले आश्वासन दिएको सहभागी उद्योगीले बताए ।

यसैबीच, कोशी प्रदेश प्रहरी कार्यालयले मंगलबार यो घटनाका विषयमा जिल्ला प्रहरी कार्यालय मोरङका प्रहरी उपरीक्षक (एसपी) कवित कटवाललाई २४ घण्टाभित्र लिखित स्पष्टीकरण पेस गर्न निर्देशन दिएको छ ।

उद्योगी व्यवसायी मुन्दडाको घरमा प्रहरीले छापा हानेको विषयमा प्रदेश प्रहरी कार्यालयले एसपी कटवालसँग स्पष्टीकरण मागेको हो । छापा मार्नुको कारण, प्राप्त सूचना तथा त्यसलाई पुष्टि गर्ने आधार र प्रमाणसहित २४ घण्टाभित्र लिखित जवाफ पेस गर्न भनिएको छ ।

“हामीले प्रहरीले अपुष्ट सूचनाका आधारमा उद्योगी व्यवसायीको घर र उद्योगमा छापा मार्दा मानमर्दन भएको र सामाजिक प्रतिष्ठामा गम्भीर आघात पुगेको गुनासो गर्यौँ । मान-प्रतिष्ठा र विश्वासकै भरमा अर्बौँको कारोबार गर्दै आएका छौँ । प्रहरीले अपुष्ट सूचनाका आधारमा घर र गोदाममा छापा मारेर मान-प्रतिष्ठा नै सडकमा ल्याइदिएपछि कारोबार नै प्रभावित भएको छ,” छलफलमा सहभागी उद्योगीले डीआईजीसमक्ष गुनासो पोखेका थिए ।

अपुष्ट सूचनाको भरमा उद्योगी-व्यवसायीलाई आतंकित पार्ने शैलीमा ठूलो संख्यामा सुरक्षाकर्मी परिचालन गरी लामो समयसम्म छापा मारेर त्रसित बनाएको र कानुन कार्यान्वयन राज्यको दायित्व भए पनि त्यसको कार्यान्वयन गर्दा नागरिकको सम्मान, प्रतिष्ठा, व्यावसायिक निरन्तरता तथा प्राकृतिक न्यायको सिद्धान्तलाई समेत समान रूपमा ध्यान दिन डीआईजीसमक्ष आग्रह गरिएको सहभागी उद्योगीहरूले बताएका छन् ।

Originally published on abcnews.com.np.