तानसेन । गत साउन ७ गते तानसेन–४ स्थित मिलेनियम माध्यमिक विद्यालयको क्यान्टिनमा भएको आगलागीमा परी गम्भीर घाइते बालिकाको उपचारका क्रममा मृत्यु भएको छ।

सोही विद्यालयको एलकेजी कक्षामा अध्ययनरत तानसेन–४ की ८ वर्षीया साजुदा वानु नास्ता खाने क्रममा भएको आगलागीमा परी गम्भीर घाइते हुनुभएको थियो । उहाँको उपचारका क्रममा बुधबार काठमाडौँस्थित कीर्तिपुर बर्न अस्पतालमा मृत्यु भएको जिल्ला प्रहरी कार्यालय पाल्पाका प्रहरी नायब उपरीक्षक भीमलाल भट्टराईले जानकारी दिनुभयो।

ग्यासको पाइप फुस्किएर भएको आगलागीमा परी घाइते वानुको तानसेनस्थित युनाइटेड मिसन अस्पतालमा प्राथमिक उपचार गरिएको थियो। त्यसपछि थप उपचारका लागि उनलाई काठमाडौँ लगिएको थियो।

आगलागीबाट बालिकाको अनुहार, दुवै हात, छातीको दायाँ भाग तथा कम्मरदेखि पैतालासम्मको गरी शरीरको ३५ प्रतिशतभन्दा बढी भाग जलेको थियो।

Originally published on abcnews.com.np.