काठमाडौं । ओमानको मस्कटस्थित नेपाली राजदूतावासले नेपाल–ओमानबीच व्यापार, लगानी र व्यावसायिक सम्बन्ध विस्तार गर्ने उद्देश्यले ‘व्यापार तथा सम्बन्ध स्थापना’ विषयक कार्यक्रम आयोजना गरेको छ। कार्यक्रममा नेपालबाट निर्यात गर्न सकिने उत्पादन, नेपालमा रहेका लगानीका अवसर तथा दुई देशका व्यवसायीबीच सहकार्य विस्तारका विषयमा छलफल गरिएको थियो।

कार्यक्रममा कार्यवाहक राजदूत विशेषकुमार साहले ओमानलाई नेपालका लागि व्यापार तथा लगानी प्रवर्द्धनको महत्वपूर्ण साझेदारका रूपमा लिइएको बताउँदै नेपालमा उपलब्ध लगानीका अवसर र अनुकूल वातावरणबारे जानकारी गराएका थिए। कार्यक्रममा नेपालबाट पहिलोपटक उच्चस्तरीय व्यापारिक प्रतिनिधिमण्डल सहभागी भएको उल्लेख गर्दै नेपाली उत्पादनको अन्तर्राष्ट्रिय बजार विस्तारमा यस्ता कार्यक्रमले सहयोग पुग्ने विश्वास व्यक्त गरिएको थियो।

कार्यक्रममा निर्यात व्यवसारी महासङ्घ र नेपाल हस्तकला महासङ्घका प्रतिनिधिले नेपाली उत्पादन, हस्तकलाको मौलिकता तथा खाडी मुलुकमा रहेका व्यापारिक सम्भावनाबारे प्रस्तुति दिएका थिए। नेपाली उत्पादनको प्रदर्शनीसमेत गरिएको कार्यक्रममा ओमानका व्यवसायी, हाइपरमार्केटका प्रतिनिधि, सञ्चारकर्मी तथा नेपाली व्यवसायीसहित ७० भन्दा बढीको सहभागिता रहेको नेपाली राजदूतावासले जनाएको छ।

Originally published on abcnews.com.np.