काठमाडौं । नेपाली कांग्रेसले तिब्बततर्फबाट आएको बाढीका कारण भोटेकोसी क्षेत्रमा भएको ठूलो जनधनको क्षतिप्रति दुःख व्यक्त गर्दै बिहीबार आयोजना हुने महिला उद्यमशीलता सम्मेलन र ग्रीन टेबल शृंखलाको १८औँ कार्यक्रम स्थगित गरेको छ ।

कांग्रेस केन्द्रीय कार्यसमितिको आकस्मिक बैठकले विपद्को वर्तमान अवस्थालाई ध्यानमा राख्दै दुवै कार्यक्रम तत्कालका लागि स्थगित गर्ने निर्णय गरेको हो ।

सभापति गगनकुमार थापाले बाढी प्रभावित क्षेत्रमा उद्धार तथा राहतका लागि पार्टीका नेता–कार्यकर्ता र भ्रातृ संस्थाहरूलाई सक्रिय हुन आग्रह गरेका छन् ।

“विपत्मा परेका मानिसहरूलाई तत्काल मद्दत पुर्‍याउनुपर्छ । मानवीयताभन्दा ठूलो कुरा केही छैन,” थापाले भने ।

मोहन आचार्यको संयोजनमा राहत परिचालन

सभापति थापाले प्रभावित क्षेत्रका कांग्रेस सांसद मोहन आचार्यसँग समन्वय भइरहेको जानकारी दिए ।

उनका अनुसार मोहन आचार्यको संयोजनमा आवश्यक स्रोत, साधन र जनशक्ति परिचालन गरी राहत वितरण गरिनेछ । कांग्रेसका विभिन्न भ्रातृ तथा शुभेच्छुक संस्थाहरूलाई समेत प्रभावित क्षेत्रमा सहयोगका लागि परिचालन गरिने थापाले बताए ।

कांग्रेसले विपद्को समयमा राजनीतिक तथा अन्य कार्यक्रमभन्दा मानवीय उद्धार र राहतलाई प्राथमिकता दिनुपर्ने जनाएको छ ।

Originally published on abcnews.com.np.