काठमाडौं । राष्ट्रिय प्रजातन्त्र पार्टी (राप्रपा) की प्रमुख सचेतक खुश्बु ओलीले रसुवामा आएको विनाशकारी बाढीलाई केवल प्राकृतिक विपद्का रूपमा नहेरी जलवायु न्याय र हिमाली सुरक्षाको राष्ट्रिय एजेन्डा बनाउन सरकारसँग माग गरेकी छन् ।

बुधबार प्रतिनिधिसभाको बैठकमा बोल्दै ओलीले रसुवामा देखिएको विनाश अत्यन्त पीडादायी भएको बताइन् । प्रारम्भिक अवस्थाका आधारमा बाढी हिमताल विस्फोट (GLOF) का कारण आएको हुन सक्ने आशंका गर्दै उनले यसको वास्तविक कारण वैज्ञानिक रूपमा पहिचान गर्नुपर्नेमा जोड दिइन् ।

उनले जलवायु परिवर्तनमा नेपालको योगदान नगण्य भए पनि यसको असर भने नेपालले ठूलो मानवीय तथा भौतिक क्षतिका रूपमा व्यहोर्नुपरेको बताइन् ।

पूर्वसूचना र हिमतालको अनुगमनमा जोड

ओलीले विपद्पछि राहत र उद्धारमा मात्रै सीमित नभई पूर्वसूचना प्रणाली सुदृढीकरण, जोखिमयुक्त हिमतालको नियमित अनुगमन तथा जलवायु प्रतिरोधी पूर्वाधार निर्माणलाई प्राथमिकता दिनुपर्ने बताइन् ।

जोखिममा रहेका बस्तीको पूर्वतयारी तथा आवश्यक पर्दा सुरक्षित स्थानमा स्थानान्तरण गर्ने ठोस व्यवस्था राज्यले गर्नुपर्ने उनको भनाइ छ ।

अन्तर्राष्ट्रिय मञ्चमा नेपालको आवाज उठाउन आग्रह

नेपाल जलवायु संकटको सिर्जनाकर्ताभन्दा यसको अग्रपंक्तिमा रहेको प्रभावित राष्ट्र भएको उल्लेख गर्दै ओलीले सरकारले प्रभावकारी जलवायु कूटनीतिमार्फत अन्तर्राष्ट्रिय समुदायसमक्ष नेपालको मुद्दा बलियो रूपमा उठाउनुपर्ने बताइन् ।

उनले जलवायु वित्त, अनुकूलन सहयोग तथा अत्याधुनिक पूर्वसूचना प्रविधिका लागि अन्तर्राष्ट्रिय स्रोत सुनिश्चित गर्न सरकारसँग आग्रह गरिन् ।

राहतमा विगतको कमजोरी नदोहोर्‍याउन चेतावनी

ओलीले विगतको जाजरकोट भूकम्पका क्रममा राहत वितरणमा देखिएको कमजोरी स्मरण गर्दै रसुवाका बाढीपीडितले त्यस्तै समस्या भोग्न नपरोस् भनी सरकारलाई सचेत गराइन् ।

उनले विपद्को कठिन घडीमा सदनदेखि समाजका सबै वर्गलाई प्रभावित नागरिकको उद्धार, राहत र सहयोगमा एकजुट हुनसमेत अपिल गरिन् ।

Originally published on abcnews.com.np.