काठमाडौं, साउन २१ । चितवनको देवघाटस्थित नारायणी नदीको जलसतह सतर्कता तह पार गरेको छ। बाढी पूर्वानुमान महाशाखाले नदीको बहाव अझै बढ्दो क्रममा रहेकाले तल्लो तटीय क्षेत्रका बासिन्दालाई उच्च सतर्कता अपनाउन आग्रह गरेको छ।
महाशाखाका अनुसार बिहीबार बिहान ११ः१६ बजे देवघाट जलमापन केन्द्रमा नारायणी नदीको जलसतह सतर्कता तहभन्दा माथि पुगेको हो।
नदीको बहाव अझै बढिरहेको जनाउँदै महाशाखाले तल्लो तटीय क्षेत्र, नदी किनार तथा डुबान भइरहने स्थानका बासिन्दालाई आज रातिसम्म विशेष सावधानी अपनाउन अनुरोध गरेको छ।
सम्बन्धित निकायले नदी आसपासका क्षेत्रका स्थानीयवासीलाई नदीको सतह र मौसमसम्बन्धी सूचनामा निरन्तर ध्यान दिन तथा आवश्यक परे सुरक्षित स्थानमा जान तयारी अवस्थामा रहन आग्रह गरेको छ।
Originally published on abcnews.com.np.
प्रतिक्रिया दिनुहोस्