गौशाला । मधेश प्रदेश सरकारअन्तर्गत धनुषा जिल्लामा सञ्चालित अधिकांश बहुवर्षीय पूर्वाधार योजना अन्तिम चरणमा पुगेका छन्। पूर्वाधार विकास कार्यालय जनकपुरधामका अनुसार जिल्लामा सञ्चालनमा रहेका ३२ बहुवर्षीय योजनामध्ये अधिकांश चालु आर्थिक वर्षभित्रै सम्पन्न हुने अवस्थामा छन्। ‘एक निर्वाचन क्षेत्र–एक सडक’ कार्यक्रमअन्तर्गत प्रत्येक निर्वाचन क्षेत्रमा पाँच किलोमिटर सडक निर्माण तथा कालोपत्र गर्ने काम पनि अन्तिम चरणमा पुगेको कार्यालयले जनाएको छ।

कार्यालयका अनुसार जनकपुरधाम–१ स्थित जलाद खोलामा पुल निर्माण र भीमान–महनगाछी–किसनपुर सडक कालोपत्रको काम सम्पन्न भइसकेको छ। गत आर्थिक वर्षमा ५७ किलोमिटर सडक ढलान, २२ वटा कल्भर्ट निर्माण, २२ दशमलव ५ किलोमिटर सडक ग्राभेल, एक किलोमिटर कालोपत्र तथा सात किलोमिटर सडक मर्मतको काम सम्पन्न गरिएको छ। साथै बीपी स्मृति सभाहल, योगनारायण स्मृति सभाहल, २२ वटा सामुदायिक भवन र दुई वटा सभाहल निर्माण पनि सम्पन्न भएको जनाइएको छ।

आवासतर्फ जनता आवास कार्यक्रमअन्तर्गत धनुषा र महोत्तरीमा निर्माणाधीन ७९६ आवासमध्ये ६३८ वटा सम्पन्न भइसकेका छन्। यस्तै महेन्द्र नारायण निधि विपन्न आवास योजनाअन्तर्गत १०५ मध्ये ७१ र मदन भण्डारी विपन्न आवास योजनाअन्तर्गत ५५ मध्ये २९ वटा आवास निर्माण सम्पन्न भएको कार्यालयले जनाएको छ। बाँकी योजनाको काम पनि तीव्र गतिमा अघि बढिरहेको बताइएको छ।

Originally published on abcnews.com.np.