बनेपा । काठमाडौं विश्वविद्यालय (केयू)को उपकुलपति नियुक्तिका लागि आवेदन दिएका ३५ उम्मेदवारमध्ये १० जनाको सङ्क्षिप्त सूची (सर्टलिस्ट) सार्वजनिक गरिएको छ। शिक्षा, विज्ञान तथा खेलकुद मन्त्रालयले सूची सार्वजनिक गर्दै शुक्रबार उम्मेदवारहरूको प्रस्तुतीकरण र अन्तर्वार्ता हुने जनाएको छ।

मन्त्रालयका अनुसार सङ्क्षिप्त सूचीमा दयाराम पोखरेल, निरञ्जन पराजुली, बालचन्द्र लुइटेल, विकास नकर्मी, बिमप्रसाद श्रेष्ठ, राजेन्द्र जोशी, विवेक बराल, शेषानन्द सञ्जेल, सुबोध शर्मा र हरिप्रसाद न्यौपाने परेका छन्।

मन्त्रालयले यी उम्मेदवारका सम्बन्धमा बुधबारभित्र राय तथा सुझाव उपलब्ध गराउन पनि सरोकारवालासँग आग्रह गरेको छ।

सूचनाअनुसार दयाराम पोखरेल, निरञ्जन पराजुली, बालचन्द्र लुइटेल, विकास नकर्मी र बिमप्रसाद श्रेष्ठले शुक्रबार बिहान ८ बजेदेखि १५–१५ मिनेटको प्रस्तुतीकरण गर्नेछन्। त्यसपछि राजेन्द्र जोशी, विवेक बराल, शेषानन्द सञ्जेल, सुबोध शर्मा र हरिप्रसाद न्यौपानेले शुक्रबार दिउँसो १ बजेदेखि आफ्नो प्रस्तुतीकरण दिनेछन्। प्रस्तुतीकरण सम्पन्न भएपछि उम्मेदवारहरूको अन्तर्वार्ता लिइने मन्त्रालयले जनाएको छ।

उपकुलपति पदका लागि आवेदन दिएका पूर्वउपकुलपति प्रा. डा. अच्युतप्रसाद वाग्ले भने यसपटकको सङ्क्षिप्त सूचीमा पर्न सकेनन्।

सर्टलिस्टमा परेका उम्मेदवारमध्ये दयाराम पोखरेल, शेषानन्द सञ्जेल र विकास नकर्मी काठमाडौं विश्वविद्यालयबाहिरका व्यक्तित्व हुन् भने अन्य सात जना विश्वविद्यालयसँग आबद्ध रहेका छन्।

काठमाडौं विश्वविद्यालयको उपकुलपति पदमा नाम सिफारिस गर्न ‘काठमाडौं विश्वविद्यालयको उपकुलपति छनोट तथा सिफारिससम्बन्धी कार्यविधि, २०८३’ बमोजिम छनोट प्रक्रिया अघि बढाइएको मन्त्रालयले जनाएको छ।

Originally published on abcnews.com.np.