काठमाडौं  । नेपाली कांग्रेसका महामन्त्री गुरुराज घिमिरेले पार्टीको आधिकारिकतासम्बन्धी विषय सर्वोच्च अदालतमा पुनरावलोकनको चरणमा प्रवेश गरेको भन्दै अदालतको कानुनी प्रक्रियाप्रति पूर्ण सम्मान रहने बताउनुभएको छ।

शुक्रबार जारी विज्ञप्तिमार्फत महामन्त्री घिमिरेले कानुनी प्रक्रिया आफ्नो मार्गमा अघि बढिरहे पनि पार्टीको संगठन सुदृढीकरण, आन्तरिक लोकतन्त्रको सुदृढीकरण, सुशासन प्रवर्द्धन तथा जनविश्वास पुनर्स्थापनाको अभियान कुनै पनि हालतमा नरोकिने स्पष्ट पार्नुभएको हो।

उहाँले नेपाली कांग्रेसको वर्तमान राजनीतिक दिशा अधिकांश महाधिवेशन प्रतिनिधिको विश्वास, विशेष महाधिवेशनबाट प्राप्त वैधानिक जनादेश तथा पार्टी रूपान्तरणको साझा संकल्पबाट निर्देशित भएको उल्लेख गर्नुभएको छ। कानुनी प्रक्रियाले आफ्नो गति लिने भए पनि संगठन निर्माणको अभियान अझ तीव्र रूपमा अघि बढाइने उहाँको भनाइ छ।

महामन्त्री घिमिरेले लोकतन्त्रको मूल आधार असहमतिलाई स्वीकार गर्नु भए पनि त्यसलाई अन्तहीन विवादमा रूपान्तरण गर्नु उचित नहुने धारणा राख्नुभएको छ। उहाँले संवाद, संस्थागत प्रक्रिया र पार्टी विधान नै लोकतान्त्रिक राजनीतिक दलको विश्वसनीय आधार भएको उल्लेख गर्नुभएको छ।

विज्ञप्तिमा संस्थाका निर्णय आफूअनुकूल हुँदा मात्र स्वीकार गर्ने र प्रतिकूल हुँदा अस्वीकार गर्ने प्रवृत्तिले संस्थागत राजनीतिभन्दा व्यक्तिकेन्द्रित राजनीतिलाई बढावा दिने चेतावनी पनि दिइएको छ।

महामन्त्री घिमिरेले वर्तमान अवस्थामा नेपाली कांग्रेसलाई विभाजनको बहसभन्दा एकताको संकल्प आवश्यक रहेको उल्लेख गर्दै अविश्वासको राजनीतिभन्दा रूपान्तरणमुखी नेतृत्वको आवश्यकता औंल्याउनुभएको छ।

उहाँले पार्टीका नेता, कार्यकर्ता तथा शुभेच्छुकलाई व्यक्तिगत आग्रह वा गुटगत स्वार्थभन्दा माथि उठेर संगठन, सिद्धान्त र साझा भविष्यको पक्षमा दृढतापूर्वक उभिन आह्वान गर्नुभएको छ।

Originally published on abcnews.com.np.