काठमाडौं । राष्ट्रिय स्वतन्त्र पार्टी (रास्वपा) का नेता तथा सांसद मनीष झाले प्रधानमन्त्री बालेन्द्र शाह (बालेन) लाई सरकारमा कोही पनि एक्लो नरहेको भन्दै सरकारलाई सफल बनाउन सबै एकसाथ रहेको सन्देश दिएका छन्।

प्रधानमन्त्री शाहले शुक्रबार राति सामाजिक सञ्जाल फेसबुकमार्फत ‘कहिलेकाहीँ एक्लै लड्नुपर्छ, यो पहिलोपटक होइन’ भन्ने आशयको स्टाटस सार्वजनिक गरेपछि नेता झाले त्यसको जवाफ दिएका हुन्।

फेसबुकमार्फत प्रतिक्रिया जनाउँदै झाले सरकार परिवर्तनका लागि प्राप्त जनादेशलाई सफल बनाउन पार्टीका सबै नेता तथा सांसद सरकारको साथमा रहेको उल्लेख गरेका छन्।

‘परिवर्तनका लागि यो महान् जनादेश पाएको सरकारमा कोही एक्लो छैन। हामी सबै साथमा छौँ,’ उनले लेखेका छन्।

संसदको आलोचना सरकार कमजोर बनाउन होइन

झाले सरकारको नियत र उद्देश्यप्रति आफूहरूको कुनै शंका नरहेको स्पष्ट पारेका छन्। तर, सरकारका केही काम र कार्यशैलीमा सुधार आवश्यक रहेको भन्दै संसदमा उठाइएका प्रश्नहरू सरकारलाई कमजोर बनाउने उद्देश्यले नभई सुधारका लागि भएको संकेत गरेका छन्।

उनले प्रधानमन्त्रीलाई प्राप्त ऐतिहासिक अवसरलाई सफलतापूर्वक उपयोग गर्न निरन्तर सचेत गराइरहने प्रतिबद्धता पनि व्यक्त गरेका छन्।

‘यो ऐतिहासिक अवसर खेर नजाओस् भनेर सजग रहने र सचेत गराउने काम निरन्तर रहनेछ,’ उनले उल्लेख गरेका छन्।

संसदमा आफ्नै सांसदको आलोचनापछि प्रधानमन्त्रीको संकेतपूर्ण स्टाटस

शुक्रबार बसेको प्रतिनिधिसभा बैठकमा रास्वपाकै सांसदहरूले सरकारको कार्यशैली, ग्यास अभाव, जनजीविकाका समस्या, सेवा प्रवाह र प्रशासनिक प्रभावकारितामाथि प्रश्न उठाएका थिए।

रास्वपाका सांसद मनीष झा, रमेश प्रसाईं, इन्दिरा राना, पारसमणि गेलाल, कमल सुवेदी, अमरेश सिंह लगायतले सरकारलाई जनअपेक्षाअनुसार काम गर्न दबाब दिएका थिए। विशेषगरी ग्यास अभाव, महँगी, स्वास्थ्य सेवा, निजी क्षेत्रको विश्वास र सेवा प्रवाहका विषयमा सरकारलाई सदनमै जवाफदेही बनाउन खोजिएको थियो।

यसैक्रममा प्रधानमन्त्री शाहले शुक्रबार राति फेसबुकमा लेखेका थिए—

‘केही समय लाग्छ, सही समय आउनलाई। ढिला होला, तर गलत हुँदैन। नआत्तिनुहोस्। सुनेको र देखेकोभन्दा वास्तविकता कहिलेकाहीँ फरक हुन सक्छ। कहिलेकाहीँ एक्लै लड्नुपर्छ। यो पहिलो चोटि होइन।’

प्रधानमन्त्रीको उक्त अभिव्यक्तिलाई सरकारभित्र र पार्टीभित्र देखिएको दबाबसँग जोडेर विभिन्न राजनीतिक वृत्तमा चर्चा भइरहेका बेला नेता झाले सार्वजनिक रूपमा सरकारसँग आफ्नो समर्थन रहेको सन्देश दिएका हुन्।

सरकारभित्र सुधारको दबाब र एकताको सन्देश

पछिल्ला केही दिनयता रास्वपाकै सांसदहरूले संसद् र संसदीय समितिहरूमा सरकारका निर्णय र कार्यसम्पादनमाथि लगातार प्रश्न उठाइरहेका छन्। त्यसले सरकारभित्र नीतिगत सुधारको आवश्यकता र आन्तरिक छलफल दुवैलाई संकेत गरेको विश्लेषण भइरहेको छ।

यही पृष्ठभूमिमा नेता मनीष झाको अभिव्यक्तिलाई सरकारभित्र आलोचनासँगै सहयोग र सुधारको सन्देश दिने प्रयासका रूपमा हेरिएको छ। उनले सरकारको उद्देश्यप्रति विश्वास कायम रहेको उल्लेख गर्दै प्राप्त जनादेशलाई सफल बनाउन सबै मिलेर काम गर्नुपर्नेमा जोड दिएका छन्।

Originally published on abcnews.com.np.