त्रिशूली । नुवाकोटको पञ्चकन्या गाउँपालिकाले उत्पादन गरेको ‘घ्याङस्वारा अग्र्यानिक चिया’को मूल्य प्रतिकिलो ६ हजार रुपैयाँ निर्धारण गरेको छ। पञ्चकन्या–४ घ्याङस्वाराको बाँझो सार्वजनिक जग्गालाई कृषियोग्य बनाएर लगाइएको चियाको गुणस्तर परीक्षणमा उत्कृष्ट नतिजा आएपछि गाउँपालिकाले तयारी चियाको मूल्य निर्धारण गरेको हो।

गाउँपालिकाका अध्यक्ष तेजबहादुर तामाङका अनुसार स्थानीय सरकार सञ्चालन ऐनअन्तर्गत तयार गरिएको ‘घ्याङस्वारा अग्र्यानिक चिया उत्पादन, प्रशोधन, प्याकेजिङ, ब्रान्डिङ, मूल्य निर्धारण, बिक्री तथा वितरणसम्बन्धी कार्यविधि, २०८३’ अनुसार मूल्य तोकिएको हो। पहिलोपटक गत चैतमा टिपिएको चियापत्ती प्रशोधन गरी तयारी चिया उत्पादन सफल भएपछि गाउँपालिकाले यसलाई व्यावसायिक कारोबारसँग जोड्ने योजना अघि बढाएको हो।

गाउँपालिकाले ५०० ग्राम चियाको मूल्य ३ हजार, २५० ग्रामको १ हजार ५००, १०० ग्रामको ६ सय, ५० ग्रामको ३ सय र २५ ग्रामको १ सय ५० रुपैयाँ तोकेको छ। गत वैशाखमा ‘घ्याङस्वारा अग्र्यानिक चिया’ नामकरण गरी सार्वजनिक गरिएको चियालाई बजारमा लैजान आवश्यक ट्रेडमार्क, अनुज्ञापत्र तथा मूल्य निर्धारणलगायतका प्रक्रिया पूरा गरिएको गाउँपालिकाले जनाएको छ।

घ्याङस्वाराको ३३२ रोपनी सार्वजनिक जग्गामा प्रधानमन्त्री रोजगार कार्यक्रमअन्तर्गत ८३ हजार चियाका बिरुवा रोपिएको थियो। जनप्रतिनिधि, कर्मचारी, शिक्षक, विद्यार्थी तथा स्थानीयवासीको श्रमदानबाट चार वर्षअघिसम्म बाँझो रहेको जग्गामा चिया खेती सुरु गरिएको हो। हाल करिब १२ हजार बिरुवाले उत्पादन दिन थालेका छन् भने स्थानीय किसानलाई अनुदानमा वितरण गर्न गाउँपालिकाले थप ८४ हजार बिरुवा तयार गरेको जनाएको छ।

समुद्री सतहबाट १ हजार ८ सयदेखि २ हजार २ सय मिटर उचाइमा रहेको घ्याङस्वारामा उत्पादित चियाको प्रशोधनमा ककनीस्थित चिया तथा कफी विकास कार्यालयले सहयोग गरेको छ। गाउँपालिकाले चिया उत्पादनलाई स्थानीय रोजगारी सिर्जना, कृषिमा आत्मनिर्भरता र पर्यटन प्रवर्द्धनसँग जोडेर व्यावसायिक रूपमा अघि बढाउने लक्ष्य लिएको छ।

Originally published on abcnews.com.np.