काठमाडौं । रूपन्देहीको शिवपुर सबस्टेसनमा आएको प्राविधिक खराबीका कारण शनिबार राति एकीकृत नेपाल विद्युत् प्रणालीमा आंशिक अवरोध आएको छ। सबस्टेसनको स्विचयार्डमा जम्पर कन्डक्टर चुडिँदा पश्चिम तथा मध्य क्षेत्रको विद्युत् आपूर्ति केही समय प्रभावित भएको नेपाल विद्युत् प्राधिकरणले जनाएको छ।
प्राधिकरणका अनुसार शनिबार राति करिब १० बजे मोतिपुर–शिवपुर १३२ केभी प्रसारण लाइनको सर्किट–२ मा पीटी र आइसोलेटरबीच रहेको जम्पर कन्डक्टर चुडिएको थियो। त्यसपछि ‘ओपन कन्डक्टर फल्ट’ उत्पन्न भई सर्किट–२ पूर्ण रूपमा बन्द हुन पुगेको थियो।
१८० मेगावाट लोड अचानक गुम्यो
सर्किट–२ बन्द भएपछि त्यसको सम्पूर्ण भार सर्किट–१ मा परेको थियो। अत्यधिक भारका कारण पश्चिमी क्षेत्रमा करिब १८० मेगावाट लोड अचानक गुम्न पुगेको प्राधिकरणले जनाएको छ।
त्यसको श्रृङ्खलाबद्ध असरका रूपमा ओभरलोड र ओभरकरेन्ट भएपछि पथलैया–चपुर र पथलैया–ढल्केबर १३२ केभी प्रसारण सर्किटसमेत ट्रिप भएका थिए।
प्रसारण लाइनहरू ट्रिप भएपछि पश्चिम तथा मध्य क्षेत्रका विद्युत् उत्पादन केन्द्रमा ‘ओभर फ्रिक्वेन्सी’ को समस्या देखिएको थियो। त्यसका कारण केही उत्पादन युनिटसमेत स्वतः बन्द हुन पुगेका थिए।
यसले राष्ट्रिय विद्युत् प्रणालीमा थप जटिलता उत्पन्न गरेको प्राधिकरणले जनाएको छ।
रातभर मर्मत, क्रमशः आपूर्ति पुनःस्थापित
प्राविधिक समस्या देखिएलगत्तै नेपाल विद्युत् प्राधिकरणले प्राविधिक टोली परिचालन गरेको थियो। टोलीले रातभर काम गरी चुडिएको जम्पर कन्डक्टर प्रतिस्थापन गरेपछि विद्युत् प्रणाली पुनःस्थापनाको प्रक्रिया अघि बढाइएको थियो।
पुनःस्थापनाका क्रममा सुरुमा पथलैया–चपुर १३२ केभी सर्किटमार्फत मध्य क्षेत्र तथा प्रमुख लोड भएका क्षेत्रमा विद्युत् आपूर्ति गरिएको थियो।
त्यसैगरी **बुटवल र कोहलपुर क्षेत्रलाई सम्बन्धित ‘आइसल्यान्ड ग्रिड’**मार्फत सञ्चालनमा ल्याइएको थियो।
अन्ततः हेटौँडा–कुलेखानी–स्युचाटार ६६ केभी तथा हेटौँडा–मातातीर्थ १३२ केभी करिडोरमार्फत राष्ट्रिय विद्युत् प्रणाली पूर्ण रूपमा पुनःस्थापित गरिएको प्राधिकरणले जनाएको छ।
विद्युत् आपूर्ति सामान्य
आकस्मिक प्राविधिक समस्याका कारण विद्युत् आपूर्तिमा अवरोध हुँदा ग्राहकमा पर्न गएको असुविधाप्रति नेपाल विद्युत् प्राधिकरणले दुःख व्यक्त गरेको छ।
प्राधिकरणले यस्ता प्राविधिक समस्या तत्काल समाधान गरी विद्युत् सेवा सुचारु गर्न आफूहरू निरन्तर सक्रिय रहेको जनाएको छ।
हाल मुलुकभरको विद्युत् आपूर्ति सामान्य अवस्थामा फर्किएको प्राधिकरणले स्पष्ट पारेको छ।
Originally published on abcnews.com.np.
प्रतिक्रिया दिनुहोस्