काठमाडौं । सुनसरीको देवानगञ्जमा भएको घटनामा संलग्न रहेको आशंकामा प्रहरीले केही व्यक्तिलाई नियन्त्रणमा लिएर अनुसन्धान थालेको छ। जिल्ला प्रहरी कार्यालय सुनसरीका प्रवक्ता डीएसपी चन्द्रबहादुर खड्काले घटनामा संलग्न हुन सक्ने आशंकामा केही व्यक्तिलाई नियन्त्रणमा लिइएको जानकारी दिएका हुन्।

घटनाको संवेदनशीलतालाई ध्यानमा राख्दै नियन्त्रणमा लिइएकाहरूको पहिचान सार्वजनिक नगरिएको प्रहरीले जनाएको छ। डीएसपी खड्काका अनुसार उनीहरू घटनामा वास्तवमै संलग्न थिए वा थिएनन् र उनीहरूको भूमिका के थियो भन्ने विषयमा सूक्ष्म अनुसन्धान भइरहेको छ।

देवानगञ्जमा भएको घटनालाई उत्तेजित बनाउन, आगजनी गर्न वा अन्य हिंसात्मक गतिविधि फैलाउन उनीहरूको भूमिका रहे–नरहेको अनुसन्धानबाट पुष्टि हुने प्रहरीले जनाएको छ। साथै, सामाजिक सञ्जालमा विभिन्न व्यक्तिले सार्वजनिक गरेका सूचना आधिकारिक नभएको भन्दै प्रहरीले त्यस्ता सूचनामा विश्वास नगर्न आग्रह गरेको छ।

यसैबीच, राष्ट्रिय स्वतन्त्र पार्टीका कोसी प्रदेश सदस्य दिपेन्द्र मेहताले केही युवाको तस्बिर सामाजिक सञ्जालमा सार्वजनिक गर्दै उनीहरू देवानगञ्ज घटनासँग सम्बन्धित रहेको दाबी गरेका छन्। तर, प्रहरीले नियन्त्रणमा लिइएका व्यक्तिहरूको नाम, समुदाय तथा अन्य विवरण भने सार्वजनिक गरेको छैन।

Originally published on abcnews.com.np.