काठमाडौं । नेपाल धितोपत्र बोर्ड (सेबोन)ले ‘प्राथमिक पुँजी बजार विकाससम्बन्धी श्वेतपत्र, २०८३’ सार्वजनिक गरेको छ । चालु आर्थिक वर्ष २०८३/८४ को पुँजी बजार नीतिअन्तर्गत नियामकीय सुधार अघि बढाउने क्रममा बोर्डले श्वेतपत्र सार्वजनिक गरेको हो ।

सार्वजनिक निष्कासन प्रणालीलाई गुणस्तरीय र प्रभावकारी बनाउँदै प्राथमिक पुँजी बजारको दीर्घकालीन विकास गर्ने उद्देश्यले श्वेतपत्र ल्याइएको सेबोनले जनाएको छ ।

श्वेतपत्रमा नेपालको प्राथमिक पुँजी बजारको वर्तमान अवस्था, कानुनी तथा संस्थागत सीमाहरू, समस्या र चुनौती तथा आगामी दशकका लागि आवश्यक रणनीतिक सुधारका दिशा समेटिएका छन् । प्राथमिक बजारलाई पारदर्शी, निष्पक्ष, प्रतिस्पर्धी, दक्ष र प्रविधिमैत्री बनाउँदै अन्तर्राष्ट्रिय असल अभ्यासअनुकूल विकास गर्ने एकीकृत रूपरेखा पनि प्रस्तुत गरिएको छ ।

सेबोनले प्राथमिक बजार सुधारका लागि तीन चरणको कार्यान्वयन रणनीति अघि सारेको छ । पहिलो चरणमा एक वर्षभित्र नीतिगत तथा कानुनी सुधार, दोस्रो चरणमा एकदेखि दुई वर्षभित्र संस्थागत तथा प्रविधिगत सुदृढीकरण र तेस्रो चरणमा दुईदेखि पाँच वर्षभित्र उन्नत बजार विकास गर्ने योजना राखिएको छ ।

श्वेतपत्रले निष्कासन तथा बिक्री प्रबन्धक, लेखापरीक्षक र क्रेडिट रेटिङ संस्थाहरूको ड्यु डेलिजेन्ससम्बन्धी दायित्व स्पष्ट गर्दै उनीहरूलाई थप प्रभावकारी र उत्तरदायी बनाउने लक्ष्यसमेत लिएको छ ।

सेबोनका अनुसार सुधार आईपीओ प्रणालीमा मात्र सीमित नराखी प्राथमिक बजारलाई राष्ट्रिय पुँजी निर्माण र निजी क्षेत्रको प्रतिस्पर्धात्मक विकाससँग जोडेर नेपालको समग्र आर्थिक रूपान्तरणको रणनीतिक आधारका रूपमा अघि बढाइनेछ ।

बोर्डले आगामी दिनमा सरोकारवालासँग निरन्तर परामर्श गरी प्रस्तावित सुधारलाई नीतिगत, कानुनी, प्रक्रियागत तथा प्रविधिगत रूपमा चरणबद्ध कार्यान्वयन गर्ने जनाएको छ ।

श्वेतपत्रले प्राथमिक बजारमा लगानीकर्ताको सहभागिता र वित्तीय साक्षरता बढाउनुका साथै नयाँ लगानी उपकरणको विकासमा समेत योगदान पुर्‍याउने सेबोनको विश्वास छ । दीर्घकालीन रूपमा यसले आवश्यक पुँजी परिचालनमार्फत नेपालको आर्थिक रूपान्तरणमा सहयोग पुग्ने बोर्डले जनाएको छ।

Originally published on abcnews.com.np.