काठमाडौं । नेपाल एलपी ग्यास उद्योग संघले उपभोक्तालाई आवश्यकताभन्दा बढी ग्यास खरिद गरेर सिलिन्डर सञ्चय नगर्न आग्रह गरेको छ।

संघका अध्यक्ष दिवानबहादुर चन्दले विज्ञप्ति जारी गर्दै ग्यास अभाव हुने आशंकामा उपभोक्ताले अतिरिक्त सिलिन्डर खरिद तथा सञ्चय गर्दा बजारमा कृत्रिम अभावको अवस्था सिर्जना भएको बताएका हुन्।

‘ग्यास अभाव हुने आशंकामा अनावश्यक रूपमा सिलिन्डर सञ्चय गर्ने, जगेडा राख्ने वा आवश्यकताभन्दा बढी खरिद गर्ने कार्यबाट बजारमा ग्यासको कृत्रिम अभाव सिर्जना भइरहेको छ,’ विज्ञप्तिमा भनिएको छ।

संघका अनुसार यही कारण वास्तवमै ग्यास आवश्यक पर्ने उपभोक्ताले समेत सिलिन्डर पाउन कठिनाइ भइरहेको छ।

‘अहिले देखिएको अभाव अतिरिक्त खरिदका कारण’

संघले उपभोक्ताले अतिरिक्त ग्यास खरिद नगरे अहिले देखिएको अभावको समस्या तत्काल समाधान हुने दाबी गरेको छ।

आगामी दिनमा समेत एलपी ग्यास आपूर्तिमा समस्या नहुने भन्दै संघले ग्यासको अभाव हुने अवस्था नरहेको स्पष्ट पारेको छ।

संघका अध्यक्ष चन्दका अनुसार नेपाल आयल निगमको विशेष पहलमा भारतका विभिन्न रिफाइनरीबाट एलपी ग्यासको आयात सहज रूपमा भइरहेको छ।

संघले हाल एलपी ग्यासको आयात करिब १५ प्रतिशतले बढेको दाबी गरेको छ। आयात बढेसँगै ग्यास उद्योगहरूले सिलिन्डर रिफिलिङ तथा बजारमा वितरणको काम पनि निरन्तर गरिरहेको संघको भनाइ छ।

विक्रेतालाई घरायसी उपभोक्तालाई प्राथमिकता दिन आग्रह

ग्यासको वितरणमा समेत प्राथमिकता निर्धारण गर्न संघले विक्रेताहरूलाई आग्रह गरेको छ।

संघले घरायसी प्रयोजनका उपभोक्तालाई प्राथमिकतामा राखेर ग्यास बिक्री–वितरण गर्न विक्रेतालाई अनुरोध गरेको हो।

पछिल्लो समय ग्यास अभावको आशंकामा उपभोक्ताले अतिरिक्त सिलिन्डर खरिद गर्न थालेपछि माग एकैपटक बढेको उद्योगीहरूको भनाइ छ।

यसले आपूर्ति पर्याप्त हुँदाहुँदै पनि बजारमा अभावको मनोवैज्ञानिक दबाब सिर्जना गर्न सक्ने देखिएको छ।

आपूर्ति सहज भए पनि बजारको ‘मनोविज्ञान’ चुनौती

एलपी ग्यास उद्योग संघले आपूर्ति पर्याप्त रहेको दाबी गरे पनि उपभोक्तामा अभावको डर कायम रहँदा बजारमा माग अस्वाभाविक रूपमा बढ्न सक्छ।

त्यसैले संघले उपभोक्तालाई आवश्यकताअनुसार मात्र ग्यास खरिद गर्न र विक्रेतालाई घरायसी ग्राहकलाई प्राथमिकता दिन आग्रह गरेको हो।

संघको दाबीअनुसार आयात र रिफिलिङ नियमित रहेकाले तत्काल ग्यास अभाव हुने अवस्था छैन। तर बजारमा आपूर्ति, वितरण र उपभोक्ताको मागबीच सन्तुलन कायम गर्न भने सरकारी निकाय, उद्योगी, विक्रेता र उपभोक्ता सबैको भूमिका महत्वपूर्ण हुने देखिन्छ।

Originally published on abcnews.com.np.