म्याग्दी । म्याग्दीको पश्चिमी क्षेत्रका तीन स्थानीय तहलाई सदरमुकाम बेनीसँग जोड्ने बेनी–दरवाङ सडकखण्डअन्तर्गत फापरखेत पहिरोको विकल्पमा मोटरेबल पुल निर्माण हुने भएको छ।

गण्डकी प्रदेश सरकारले चालु आर्थिक वर्ष २०८३/८४ मा दुई करोड रुपैयाँ बजेट विनियोजन गरेपछि पुल निर्माणको प्रक्रिया अघि बढाइएको हो।

गत वर्ष संघीय सरकारबाट बेलिब्रिज उपलब्ध गराउने सम्झौता भए पनि जेन्जी आन्दोलनका कारण कार्यान्वयन हुन सकेको थिएन। त्यसपछि प्रदेश सरकारले विनियोजन गरेको एक करोड रुपैयाँ बजेटसमेत खर्च हुन सकेन।

प्राविधिक अध्ययनले बेलिब्रिजलाई जोखिमपूर्ण देखाएपछि अब ‘डिजाइन एन्ड बिल्ड’ विधिबाट पक्की मोटरेबल पुल निर्माण गर्ने तयारी गरिएको छ।

सात करोड ५० लाखको स्रोत सुनिश्चित

पूर्वाधार विकास कार्यालय म्याग्दीका प्रमुख महेन्द्र बानियाँका अनुसार प्रदेश सरकारले पुल निर्माणका लागि सात करोड ५० लाख रुपैयाँको स्रोत सुनिश्चित गरिसकेको छ।

‘डिजाइन एन्ड बिल्ड’ विधिमा एउटै निर्माण कम्पनी वा ठेकेदारले पुलको डिजाइन तयार गर्नुका साथै निर्माण कार्यसमेत गर्नेछ। यसले डिजाइनदेखि निर्माणसम्मको जिम्मेवारी एउटै पक्षमा रहनेछ।

वर्षायाममा यातायात अवरुद्ध हुने समस्या

बेनी नगरपालिका–४ र मंगला गाउँपालिका–२ को सीमामा पर्ने फापरखेत क्षेत्रमा वर्षायाममा नियमित रूपमा पहिरो खस्ने गरेको छ।

२०६० सालदेखि सडक निर्माण भएयता हरेक वर्ष वर्षा सुरु भएसँगै पहिरोका कारण बेनी–दरवाङ सडकखण्डको करिब २४ किलोमिटर क्षेत्रमा यातायात सेवा प्रभावित हुने गरेको स्थानीयवासी बताउँछन्।

पहिरोका कारण यातायात अवरुद्ध हुनुका साथै दुर्घटनाको जोखिमसमेत बढ्ने गरेको उनीहरूको भनाइ छ। पछिल्लो दुई महिनामै दुई वटा मालवाहक ट्रक म्याग्दी नदीमा खसेर दुर्घटना भएका थिए।

विकास आयोजनासमेत प्रभावित

फापरखेत पहिरोका कारण मंगला, मालिका र धौलागिरि गाउँपालिकालाई बेनी बजारसँग जोड्ने सडकमा आवतजावत प्रभावित हुँदै आएको छ। बागलुङको तमानखोला गाउँपालिकाका बासिन्दाले समेत प्रयोग गर्ने यो सडकखण्ड पहिरोका कारण जोखिमपूर्ण बन्दै गएको छ।

पहिरोको समस्याले म्याग्दी नदीमा निर्माणाधीन पाँच वटा जलविद्युत् आयोजना, डाँडाखेत–राहुघाट सबस्टेसन, प्रसारण लाइन, सडक, खानेपानी तथा सिँचाइजस्ता विकास आयोजनामा समेत असर परेको छ।

पहिरो नियन्त्रणका अघिल्ला प्रयास असफल

तत्कालीन जिल्ला विकास समितिले सडकमुनि पक्की पर्खाल निर्माण गरेर म्याग्दी नदीको कटान रोक्ने प्रयास गरे पनि सडक माथिबाट खस्ने पहिरो नियन्त्रण गर्न भने सकेन।

हाल पूर्वाधार विकास कार्यालयले सडकमा खसेको पहिरो पन्छाएर यातायात सञ्चालनको व्यवस्था मिलाउँदै आएको छ।

फापरखेतको स्थायी समाधानका रूपमा पक्की मोटरेबल पुल निर्माण भएपछि वर्षायाममा सडक अवरुद्ध हुने समस्या कम हुने र पश्चिम म्याग्दीका स्थानीय तह तथा विकास आयोजनासँगको यातायात सम्पर्क थप सहज हुने अपेक्षा गरिएको छ।

Originally published on abcnews.com.np.