काठमाडौं ।  आफ्नो अभिव्यक्तिको आलोचना भएपछि राष्ट्रिय स्वतन्त्र पार्टी (रास्वपा)का सांसद हरि ढकालले सामाजिक सञ्जालमार्फत स्पष्टीकरण दिएका छन्।

आइतबार फेसबुकमा स्पष्टीकरण दिँदै ढकालले आफूले सिंहदरबारको नाम मात्र परिवर्तन गर्नुपर्छ भन्ने आशयले नभई त्यसको ‘स्वभाव–भावभङ्गी नामजस्तै देखिनु हुँदैन’ भन्ने सन्दर्भमा अभिव्यक्ति दिएको बताएका छन्।

उनले लेखेका छन्, ‘त्यो दरबारको स्वभाव–भावभङ्गी नामजस्तै देखिने हुनुहुन्न भन्ने सन्दर्भ थियो, सत्यको लिगेसीको सन्दर्भ थियो।’

यसपटकको परिवर्तन मात्र नभई विगतका राजनीतिक परिवर्तनपछि पनि देशका विभिन्न स्थानको नाम परिवर्तन गरिएको प्रसंग उल्लेख गर्दै उनले सिंहदरबारको नाम पनि परिवर्तन गरेर अर्को नाम राख्न सकिने धारणा व्यक्त गरेको बताएका छन्।

‘यसपटकको परिवर्तन होइन, पहिले–पहिलेकै परिवर्तनमा कति धेरै ठाउँका नाम परिवर्तन भए। त्यसको पनि परिवर्तन गरेर अरू नै नाम राखिदिएको भए हुने थियो भनेको थिएँ,’ उनले भनेका छन्।

ढकालले आफ्नो अभिव्यक्तिको पूर्ण भिडियो हेरेर मात्रै धारणा बनाउन आग्रह गर्दै आफू आफ्नो तर्कमा अडिग रहेको पनि बताएका छन्।

‘म मेरो तर्कमा अडिग छु– सिंह दया र करुणाको प्रतीक होइन। सिंह हिंस्रककै प्रतीक हो, घमण्डकै प्रतीक हो, शासककै प्रतीक हो,’ उनले लेखेका छन्।

Originally published on abcnews.com.np.