काठमाडौं । नेपाल एलपी ग्यास उद्योग सङ्घले पछिल्लो समय ग्यासको आयात बढेकाले उपभोक्तालाई आवश्यकताभन्दा बढी सिलिन्डर खरिद नगर्न आग्रह गरेको छ।

भारतबाट एलपी ग्यासको आयात सहज भइरहेको र उद्योगहरूले निरन्तर ग्यास रिफिलिङ गरिरहेकाले अतिरिक्त सिलिन्डर जम्मा नगर्न सङ्घले अनुरोध गरेको हो।

सङ्घका अध्यक्ष दिवानबहादुर चन्दले विज्ञप्तिमार्फत उपभोक्ताले अतिरिक्त ग्यास खरिद नगरे हाल देखिएको अभाव तत्कालै समाधान हुने बताएका छन्। आगामी दिनमा समेत ग्यास आपूर्तिमा समस्या नहुने भएकाले अभाव दोहोरिने सम्भावना नरहेको उनको भनाइ छ।

नेपाल आयल निगमको पहलमा भारतका विभिन्न रिफाइनरीबाट एलपी ग्यासको आयात करिब १५ प्रतिशतले बढेको छ। निगमका अनुसार पछिल्लो २२ दिनमा ३९ हजार ७७४ मेट्रिक टन ग्यास आयात भएको छ।

सङ्घका अनुसार यही आधारमा चालु आर्थिक वर्षको साउनमा करिब ५५ हजार मेट्रिक टन ग्यास आयात हुने अनुमान गरिएको छ। गत आर्थिक वर्षको सोही अवधिमा ४४ हजार ३१८ मेट्रिक टन ग्यास आयात भएको थियो।

सङ्घले उपभोक्तालाई मागअनुसार ग्यास उपलब्ध गराउन हरसम्भव प्रयास भइरहेको जनाएको छ। साथै, बिक्रेताहरूलाई घरायसी उपभोक्तालाई प्राथमिकता दिँदै ग्यास बिक्री–वितरण गर्न आग्रह गरेको छ।

Originally published on abcnews.com.np.