जनकपुरधाम । धनुषाको मिथिला नगरपालिका–७ ढल्केबरमा स्वीकृत ट्रमा सेन्टर अन्यत्र सार्न खोजिएको भन्दै स्थानीयवासी आन्दोलनमा उत्रिएका छन्।

ट्रमा सेन्टर निर्माणका लागि संघर्ष समिति गठन गरेर उनीहरूले चरणबद्ध आन्दोलन सुरु गरेका हुन्। समितिले गत शुक्रबार धनुषाका प्रमुख जिल्ला अधिकारी प्रेमप्रसाद लुइँटेललाई ज्ञापनपत्र बुझाएको थियो। आइतबार मसाल जुलुस निकाल्ने तयारी गरिएको छ।

साउन १९ गते प्रतिनिधिसभाको बैठकमा स्वास्थ्य तथा खाद्य स्वच्छतामन्त्री निशा मेहताले मधेस प्रदेशको सिरहास्थित लहानमा ट्रमा सेन्टर निर्माण गर्ने घोषणा गरेपछि ढल्केबरवासी आन्दोलित भएका हुन्।

मिथिला नगरपालिकाका नगरप्रमुख महेन्द्र महताका अनुसार ढल्केबरमा ट्रमा सेन्टर निर्माणका लागि विगत १० वर्षदेखि पहल हुँदै आएको छ। सरकारले आर्थिक वर्ष २०७६/७७ देखि बजेट वक्तव्यमै यसलाई समेट्दै आएको र आर्थिक वर्ष २०७९/८० तथा २०८०/८१ मा २०–२० करोड रुपैयाँ बजेट विनियोजन भएको उनले बताए।

उनका अनुसार ट्रमा सेन्टर निर्माणका लागि माटो परीक्षण, स्थल सर्वेक्षणलगायतका काम भइसकेका छन् भने आवश्यक जग्गासमेत प्राप्त भइसकेको छ। मिथिला नगरपालिका–७, साविक ढल्केबर गाविस–२ ‘क’ स्थित कित्ता नम्बर १६९ को करिब चार बिघा जग्गा ट्रमा सेन्टरका नाममा ल्याइएको नगरपालिकाले जनाएको छ।

नगरप्रमुख महताले विगतमा जग्गा र अनुमति प्रक्रियाका नाममा विभिन्न अवरोध सिर्जना गरिएको आरोप लगाउँदै अहिले सबै प्रक्रिया अघि बढिसकेको अवस्थामा लहानमा निर्माण गर्ने घोषणा गरिएको बताए।

स्वास्थ्यमन्त्री मेहताले सामाजिक सञ्जालमार्फत स्पष्टीकरण दिए पनि त्यसले स्पष्टता नदिएको मिथिला नगरपालिकाका उपप्रमुख सुनिता बुढाथोकीको भनाइ छ। उनका अनुसार मन्त्रीको स्पष्टीकरणमा लहानमा निर्माण गरेपछि क्रमशः ढल्केबरमा पनि बनाउने आशय देखिए पनि सदनबाटै स्पष्ट पार्नुपर्ने माग स्थानीयको छ।

लहानमा ट्रमा सेन्टर बनाउने विषयमा आफूहरूको विरोध नरहेको उल्लेख गर्दै उनले ढल्केबरमा पहिल्यै स्वीकृत भइसकेको आयोजना अलपत्र पार्न नहुने बताइन्।

ब्लड फोर नेपालका संस्थापक सरोजकुमार महतोले पनि संसद्मा गरिएको घोषणाको खण्डन सामाजिक सञ्जालबाट मात्र गर्नु पर्याप्त नहुने बताए। उनका अनुसार सदनबाटै वा मन्त्रीको आधिकारिक लेटरप्याडमार्फत स्पष्ट धारणा नआए आन्दोलन थप सशक्त बनाइनेछ।

मिथिला नगरपालिकाका नगरप्रमुखको नेतृत्वमा रहेको संघर्ष समितिको आन्दोलनमा स्थानीय नेता तथा जनप्रतिनिधिहरूको समेत सहभागिता रहेको छ।

Originally published on abcnews.com.np.