काठमाडौं । नेपाल अटोमोबाइल इम्पोर्टर्स एण्ड म्यानुफ्याक्चरर्स एसोसिएसन (नाइमा)को आयोजनामा साउन २६ देखि ३१ गतेसम्म काठमाडौंको भृकुटीमण्डपमा हुने नाइमा मोबिलिटी एक्स्पोको तयारी तीव्र पारिएको छ।

एक्स्पोका लागि अहिले भृकुटीमण्डपमा प्रदर्शनी हल, सवारीसाधन राख्ने स्टल तथा अन्य संरचना निर्माणको काम भइरहेको छ। स्टलमा ह्याङ्गर लगाउने, रङरोगन गर्ने तथा प्रदर्शनीस्थललाई आगन्तुकमैत्री बनाउने काम अन्तिम चरणमा पुगेको आयोजकले जनाएको छ।

गत वर्षको अटो एक्स्पोबाट प्राप्त अनुभवलाई आधार बनाउँदै यस वर्षको संस्करणलाई थप व्यवस्थित, सहज, समावेशी र आकर्षक बनाउने नाइमाले जनाएको छ। आयोजकका अनुसार यसपटक प्रदर्शनीमा ५१ वटा स्टल, ५५ भन्दा बढी ब्रान्ड र ४० भन्दा बढी नयाँ लन्च हुनेछन्।

आइतबार प्रदर्शनीस्थलको तयारी निरीक्षण गर्न नाइमा अध्यक्ष ऋतुसिंह वैद्य आफैँ भृकुटीमण्डप पुगेकी थिइन्। निरीक्षणपछि सञ्चारकर्मीसँग कुरा गर्दै उनले एक्स्पोको तयारी तीव्र गतिमा अघि बढिरहेको बताइन्।

“एक्स्पो तयारी एकदम जोरशोरले चलिरहेको छ। अब त हाम्रो चार–पाँच दिन मात्रै बाँकी छ। भृकुटीमण्डपमा काम सुरु भइसकेको छ। सबै स्टलहरूको ह्याङ्गर लगाउने काम चलिरहेको छ,” वैद्यले भनिन्।

उनका अनुसार एक्स्पोमा सहभागी ५५ वटै ब्रान्ड तयारी अवस्थामा छन्। अब प्रदर्शनीमा सहभागी कम्पनीहरूले आफ्ना उत्पादन तथा प्रविधि प्रस्तुत गर्ने चरणमा प्रवेश गरेका छन्।

वैद्यले एक्स्पोलाई केवल सवारीसाधन प्रदर्शन र बिक्रीको थलोका रूपमा मात्र सीमित नराखी नीतिगत बहसको मञ्चका रूपमा समेत विकास गर्न खोजिएको बताइन्। त्यसका लागि नीति निर्माता तथा सम्बन्धित सरकारी निकायका प्रतिनिधिलाई सहभागी गराएर अटोमोबाइल तथा मोबिलिटी क्षेत्रका नीतिबारे छलफल गरिने आयोजकले जनाएको छ।

यसपटकको एक्स्पोमा दुईपांग्रे तथा चारपांग्रे सवारीसाधनसँगै व्यावसायिक सवारी, विद्युतीय तथा हाइब्रिड मोबिलिटी समाधान, नयाँ प्रविधि, सेवा र मोबिलिटीसँग सम्बन्धित विभिन्न उत्पादन प्रदर्शनमा राखिनेछन्।

दुईपांग्रे सवारीतर्फ बजाज, होन्डा, टीभीएस, केटीएम, रोयल इन्फिल्ड, एथर, सुजुकी, याडिया, निउ, प्यूजो, बगाउस, अल्ट्राभायोलेट, केरेन, गारो, सीएफ मोटो, ट्रायम्फ, जेएक्स मोटोसीएक्सलगायत ब्रान्ड सहभागी हुने नाइमाले जनाएको छ।

गत वर्षको एक्स्पोको तुलनामा यसपटक सहभागी ब्रान्डको संख्या बढेको र नयाँ मोडल तथा प्रविधिको प्रदर्शनसमेत थप हुने भएकाले मोबिलिटी एक्स्पोलाई नेपाली अटोमोबाइल बजारमा महत्वपूर्ण प्रदर्शनीका रूपमा हेरिएको छ।

आयोजकका अनुसार एक्स्पोले नयाँ सवारीसाधन तथा प्रविधिबारे उपभोक्तालाई प्रत्यक्ष जानकारी दिने मात्र नभई नेपालको मोबिलिटी क्षेत्रको आगामी दिशा, विद्युतीय सवारीको विस्तार, पूर्वाधार र नीतिगत विषयमा समेत बहसको अवसर प्रदान गर्नेछ।

Originally published on abcnews.com.np.