काठमाडौँ । स्वास्थ्य तथा खाद्य स्वच्छतामन्त्री निशा मेहताले धनुषाको ढल्केबरमा निर्माणाधीन क्रिटिकल केयर तथा ट्रमा सेन्टरको काम नरोकिने स्पष्ट पारेकी छन्। नयाँ संरचना निर्माण सम्पन्न हुन समय लाग्ने भएकाले तत्कालका लागि सिरहाको लहानस्थित प्रादेशिक अस्पतालमा ट्रमा युनिट सञ्चालन गर्न लागिएको उनले जानकारी दिइन्।

सोमबार साउन २५ गते प्रतिनिधिसभा बैठकमा सांसदहरूले उठाएका प्रश्नको जवाफ दिँदै मन्त्री मेहताले ढल्केबरमा ट्रमा सेन्टर निर्माणको प्रक्रिया अघि बढिरहेको बताइन्। दुर्घटनामा गम्भीर घाइते भएका नागरिकलाई उपचारका लागि काठमाडौँ ल्याउनुपर्ने बाध्यता अन्त्य गर्न सरकारले तत्काल सेवा विस्तार र दीर्घकालीन पूर्वाधार निर्माणलाई सँगसँगै अघि बढाएको उनको भनाइ थियो।

लहानमा तत्काल सेवा

मन्त्री मेहताका अनुसार लहानस्थित प्रादेशिक अस्पतालमा ट्रमा सेवा सञ्चालनका लागि आवश्यक आधारभूत पूर्वाधार उपलब्ध छन्। अस्पतालमा सीटी स्क्यान, आवश्यक चिकित्सकीय जनशक्ति, पर्याप्त बिरामीको चाप र ब्लड बैंकलगायत सुविधा रहेकाले तत्काल ट्रमा युनिट सञ्चालन गर्न लागिएको हो।

उनले लहानमा ट्रमा युनिट सञ्चालन गर्नु ढल्केबरमा निर्माणाधीन ट्रमा सेन्टरको विकल्प नभएको स्पष्ट पारिन्। नयाँ संरचना निर्माण सम्पन्न नहुँदासम्म नागरिकलाई तत्काल उपचार सेवा उपलब्ध गराउने उद्देश्यले लहानमा अन्तरिम रूपमा ट्रमा युनिट सञ्चालन गर्न लागिएको उनको भनाइ छ।

ढल्केबरको निर्माण जारी रहने

मन्त्री मेहताले एक स्थानमा दीर्घकालीन स्वास्थ्य संरचना निर्माण भइरहँदा अर्को स्थानमा तत्काल सेवा विस्तार गर्नु विरोधाभास नभएको बताइन्। आवश्यकताअनुसार देशका विभिन्न स्थानमा ट्रमा सेन्टर तथा ट्रमा युनिट विस्तार गर्ने सरकारको नीति रहेको उनले जानकारी दिइन्।

दुर्घटनामा परेका नागरिकले समयमै उपचार पाउने र उपचारका लागि काठमाडौँ आउनुपर्ने बाध्यता अन्त्य गर्ने सरकारको उद्देश्य रहेको उनले बताइन्।

ढल्केबरमा निर्माण भइरहेको क्रिटिकल केयर तथा ट्रमा सेन्टरलाई दीर्घकालीन रूपमा महत्वपूर्ण स्वास्थ्य पूर्वाधारका रूपमा विकास गरिने मन्त्री मेहताले बताइन्। दुर्घटनामा घाइते हुने नागरिकको तत्काल उपचारलाई प्राथमिकतामा राख्दै आवश्यकताअनुसार स्वास्थ्य सेवा विस्तार गरिने उनको भनाइ छ।

Originally published on abcnews.com.np.