काठमाडौँ । प्रधानमन्त्री वालेन्द्र शाह निजी तथा पारिवारिक भ्रमणका क्रममा तीन दिनदेखि गण्डकी प्रदेशमा रहेका छन्। शुक्रबार काठमाडौँबाट पोखरा पुगेका प्रधानमन्त्री शाह शनिबार सडकमार्ग हुँदै मुस्ताङ पुगेका थिए।

मुस्ताङ पुगेका प्रधानमन्त्री शाहले शनिबार प्रसिद्ध धार्मिकस्थल मुक्तिनाथ मन्दिरमा दर्शन गरेका थिए। मुक्तिनाथ दर्शनपछि उनी आइतबार पुनः पोखरा फर्किएका छन्।

कास्कीका सहायक प्रमुख जिल्ला अधिकारी चित्राङ्गत बरालका अनुसार प्रधानमन्त्री शाह काठमाडौँबाट सडकमार्ग हुँदै पोखरा र त्यसपछि मुस्ताङ पुगेका थिए।

जिल्ला प्रशासन कार्यालय कास्कीका अनुसार प्रधानमन्त्रीको यो भ्रमण पूर्णतः निजी तथा पारिवारिक प्रकृतिको भएकाले कुनै औपचारिक सरकारी कार्यक्रम राखिएको थिएन।

भ्रमणका क्रममा प्रधानमन्त्री शाह शुक्रबार कास्कीको माछापुच्छ्रे गाउँपालिका–६ अस्तामस्थित अन्नपूर्ण इकोभिलेज रिसोर्टमा बसेका थिए। मुस्ताङ भ्रमण सकेर आइतबार पोखरा फर्किएपछि पनि उनी पोखरामै एक रिसोर्टमा बसेका छन्।

प्रधानमन्त्री बनेपछि शाह पहिलोपटक परिवारका सदस्यसहित निजी भ्रमणमा निस्किएका हुन्। तीनदिने गण्डकी भ्रमण पूरा गरी उनी सोमबार काठमाडौँ फर्कने कार्यक्रम रहेको जनाइएको छ।

Originally published on abcnews.com.np.