काठमाडौं । गृहमन्त्री सुधन गुरुङले उद्योगमन्त्री गौरी यादवसहित मधेश प्रदेशका सांसदहरूसँग मधेसमा पछिल्लो समय देखिएका घटनाक्रम र धार्मिक तथा साम्प्रदायिक तनावबारे छलफल गरेका छन्।

सोमबार सिंहदरबारस्थित गृह मन्त्रालयमा भएको छलफलमा मधेश प्रदेशबाट प्रतिनिधित्व गर्ने विभिन्न राजनीतिक दलका सांसद सहभागी थिए। छलफलमा मधेसमा पटक–पटक देखिने धार्मिक तथा साम्प्रदायिक तनावको दीर्घकालीन समाधान खोज्ने विषयमा केन्द्रित रहेर सांसदहरूसँग सुझाव लिइएको थियो।

राष्ट्रिय स्वतन्त्र पार्टी (रास्वपा)की सांसद नितिमा भण्डारीका अनुसार गृहमन्त्री गुरुङले यस्ता घटना पुनः दोहोरिन नदिन दीर्घकालीन समाधानका उपायबारे सांसदहरूसँग सुझाव मागेका थिए।

गृहमन्त्रीले मधेसमा उत्पन्न हुने सामुदायिक तनावलाई कसरी दीर्घकालीन रूपमा समाधान गर्न सकिन्छ भन्ने विषयमा सांसदहरूको धारणा लिएको भण्डारीले बताइन्।

छलफलका क्रममा सांसदहरूले हालै सुनसरी, सिरहासहित मधेसका विभिन्न जिल्लामा भएका घटनामा तनाव नियन्त्रण गर्ने क्रममा प्रशासन र सुरक्षाकर्मीबाट भएका कमजोरीबारे पनि ध्यानाकर्षण गराएका थिए। आगामी दिनमा सुरक्षा रणनीति सुधार गर्नुपर्ने र भिड नियन्त्रणका क्रममा संवेदनशीलता अपनाउनुपर्ने सुझाव सांसदहरूले दिएका थिए।

भण्डारीका अनुसार गृहमन्त्री गुरुङले अब यस्ता घटना दोहोरिन नदिन दीर्घकालीन समाधानमा जानुपर्ने बताएका थिए।

भिड नियन्त्रणमा प्रशासनिक कमजोरी औँल्याइयो

सांसदहरूले हालैका घटनामा भिड नियन्त्रणका क्रममा प्रहरी तथा स्थानीय प्रशासनबाट भएका कमजोरी सुधार गर्नुपर्ने बताएका छन्। साथै, धार्मिक तथा साम्प्रदायिक तनाव उत्पन्न हुनुअघि नै सम्भावित जोखिम पहिचान गरी रोकथामका उपाय अपनाउनुपर्नेमा जोड दिएका छन्।

सुनसरीको कप्तानगन्जसहित केही जिल्लामा दुई समुदायबीच बढेको तनाव नियन्त्रण गर्ने क्रममा प्रहरीले गोली चलाउँदा तीन जनाको मृत्यु भएको थियो। घटनामा केही व्यक्ति घाइतेसमेत भएका थिए। सोही पृष्ठभूमिमा गृहमन्त्रीले मधेस प्रदेशका सांसदहरूसँग छलफल गरेका हुन्।

Originally published on abcnews.com.np.